Kristian kom Jong Ajax til bjargar

Kristian lék allan leikinn í „holunni“ hjá Jong Ajax sem komst yfir eftir tæplega hálftíma leik en heimamenn svöruðu með tveimur mörkum fyrir lok fyrri hálfleiks og voru 2-1 yfir í hálfleik.

Heimamenn komust 3-1 yfir þegar klukkutími var liðinn en aðeins tveimur mínútum síðar lagði Kristian upp mark fyrir Christian Rasmussen sem minnkaði muninn í 3-2.

Steven Van Der Sloot fékk rautt spjald í liði Jong Ajax þegar fimm mínútur lifðu leiks og útlitið ekki bjart hjá gestunum. Í uppbótartíma fengu gestirnir hins vegar vítaspyrnu, Kristian fór á punktinn og jafnaði metin í 3-3, reyndust það lokatölur leiksins.

Jong Ajax er í 5. sæti B-deildarinnar með 53 stig sem myndi hleypa liðinu í umspil en Kristian og félagar mega ekki fara upp um deild þar sem Ajax er í efstu deild.