Martröðin í Mariupol: Rússar valda dauða, hungri og örvæntingu með látlausum sprengjuárásum

Það er fátt sem minnir á mennsku í Mariupol annað en ótti og örvænting. Annar eins hryllingur hefur ekki sést í Evrópu frá því í þjóðernishreinsunum í Bosníu og í seinni heimsstyrjöldinni.

Vikum saman hafa íbúar borgarinnar verið rafmagnslausir, án rennandi vatns og húshitunar og nú eru matarbirgðir á þrotum. Það er ljós í myrkrinu að tekist hefur að koma um tuttugu þúsund manns frá borginni undanfarinn sólahring en ekki hefur tekist að koma til þeirra vistum af nokkru ráði.

Engu er hlíft. Skólar, íbúðarhús og sjúkrahús eru sprengd í loft upp. Mæður og feður horfa upp á börn sýn deyja og börn missa foreldra sína.

Í sjónvarpsfréttinni sem fylgir þessari frétt sjáum við örvæntingarfulla móðir fylgjast með bráðaliðum reyna að hnoða líf í barn hennar á meðan sprengjum rignir yfir borgina.

Vladimir Putin Rússlandsforseti bannar löndum sínum að kalla innrásina stríð og þeir sem gera það geta átt yfir höfði sér allt að 15 ára fangelsi. „Sérstök hernaðaraðgerð“ skal það heita, til að afvopna úkraínska herinn, uppræta nasisma og frelsa Úkraínumenn af rússneskum uppruna undan ofsóknum úkraínskra stjórnvalda.

Rúmlega 44 prósent íbúa Mariupol eru af rússneskum uppruna. Íbúarnir ákalla ekki Putin um hjálp þessa dagana. Þau óska þess eins að sprengjuregninu linni og að þau fái frið.

Ungt par kemur hlaupandi inn á sjúkrahús. Faðirinn heldur á líflausu barni þeirra. Hjúkrunarfólk tekur á móti barninu og það er allt reynt en ekki tekst að bjarga því. Fullorðinn maður grætur yfir líki ættingja sem búið er að breiða blóðugt lak yfir. Hjúkrunarfólk bugast og grætur örmagna á göngum sjúkrahúsa. Örvæntingin á sjúkrahúsunum, á götum úti, í borginni almennt er alger.

Í miðjum hryllingnum kemur nýtt líf í heiminn. Konur fæða börn við þessar hörmulegu aðstæður. En í næsta herbergi ræður sorgin ríkjum. Sum hinna nýfæddu barna lifa en enginn veit hversu lengi. Önnur deyja ásamt mæðrum sínum eins og dæmi úr fréttum vikunnar sanna eftir sprengjuárás á fæðingar- og barnaspítala í borginni.

Nú þegar hafa á þriðja þúsund manns, konur, börn og karlmenn, fallið í Mariupol. Lík liggja á víð og dreif á götum úti. Látnum er hrúgað í flýti í fjöldagrafir á lóðum við fjölbýlishús. Fólk þorir ekki upp úr kjöllurum og loftvarnabyrgjum í langan tíma í einu vegna stöðugra stórskotaliðs- og eldflaugaárása.

Ástandið er einna verst í Mariupol en Rússar skjóta á fjölda bæja og borga og hafa hert árásir sínar á höfuðborgina Kænugarð.  Þar hefur 35 stunda útgöngubann verið í gildi frá í gær svo úkraínskir hermenn greini óvininn betur.

Úkraínumenn segja að kvikmyndir teknar með dróna í meðfylgjandi sjónvarpsfrétt vera af árás þeirra á rússneska skriðdrekasveit í útjaðri Kænugarðs í gær. Þar hafi tekist að halda aftur af innrás Rússa í borgina.

Volodymyr Zelenskyy Úkraínuforseti segir Rússa hafa breyst í blygðunarlausa hryðjuverkamenn.

„Við erum að efla aðgerðir okkar til að láta innrásarmennina standa skil á gerðum sínum. Þeir ættu að svara til saka fyrir alþjóðlegum dómstól, fyrir allt sem þeir hafa gert gegn Úkraínu, gegn þjóð okkar, fyrir þau hryðjuverk sem rússneski herinn hefur framið í landinu okkar,“ segir Zelenskyy.

Langt frá hryllingnum í Mariupol halda snyrtilega klæddir talsmenn einræðisstjórnarinnar í Rússlandi eins og Sergey Lavrov utanríkisráðherra áfram að setja umheiminum skilyrði.

„Það geta ekki verið nein vopn í Úkraínu sem ógna Rússlandi. Við erum reiðubúnir að flokka þau vopn sem við teljum okkur ekki stafa ógn af,“ sagði Lavrov í dag. En hann og Putin hafa margítrekað að ekkert minna dugi en ganga milli bols og höfuðs á úkraínska hernum.

Nú síðdegis sprengdu Rússar sögufrægt leikhús Mariupol í loft upp. Óttast er að hundruð manns hafi fallið en borgarstjóri Mariupol segir að á bilinu eitt þúsund til tólf hundruð manns hafi leitað skjóls í leikhúsinu fyrir árásina.

Varnarmálaráðherrar Atlantshafsbandalagsins komu saman til fundar í Brussel í dag um stríðið í Úkraínu. Einstök ríki bandalagsins hafa styrkt Úkraínu með vopnum og veitt aðra aðstoð og heita ráðherrarnir þrír að efla liðsstyrk NATO í bandalagsríkjunum í austur Evrópu á næstu fimm til tíu árum. 

Zelenskyy Úkraínuforseti ávarpaði Bandaríkjaþing í dag og þakkaði Bandaríkjaforseta og þinginu fyrir stuðninginn og staðfestu samþykktir þingsins fyrir því að allir þeir sem framið hefðu stríðsglæpi gegn úkraínínsku þjóðinni í stríðinu yrðu dregnir fram í dagsljósið.

„Nú er það svo, á þessum myrkasta tíma fyrir landið okkar, fyrir alla Evrópu, þá hvet ég ykkur til að gera meira. Nýjar refsiaðgerðir verða stöðugt að koma til í hverri viku þangað til hernaðarvél Rússa stöðvast,“ sagði Zelenskyy í ávarpi sínu.