Inter heldur pressu á Milan og Napoli

Ivan Perisic var maður leiksins þegar hann lagði upp bæði mörk Inter gegn Verona í ítölsku seríu A deildinni í dag, lokatölur 2-0.

Nicola Barella skoraði fyrsta markið með utanfótar skoti fyrir utan vítateig á 22. mínútu leiksins áður en Edin Dzeko þurfti ekki meira en að pota boltanum yfir línuna á 30. mínútu og þar við sat.

Sigurinn þýðir að Inter er einungis einu stigi á eftir Milan sem situr á toppi deildarinnar með 67 stig. Napoli er jafnt Inter að stigum í öðru til þriðja sæti með 66 stig. Það stefnir því í spennandi þriggja hesta kapphlaup um meistaratitilinn í síðustu sjö leikjum deildarinnar.