Fimmta sumarið í röð þar sem Stjörnu­strákur skorar fyrir á­tján ára af­mælið sitt

Adolf Daði var í fyrsta sinn í byrjunarliði Stjörnunnar í Bestu deildinni í sumar og var búinn að búa til tvö mörk eftir rúmlega tuttugu mínútna leik. Hann byrjaði á því að fiska vítaspyrnu á þriðju mínútu og skoraði síðan sjálfur nítján mínútum síðar.

Adolf Daði var aðeins sautján ára, tíu mánaða og 21 daga þegar hann mætti á Leiknisvöllinn í gær.

Adolf Daði varð með þessu marki sínu sjöundi leikmaðurinn í sögu Stjörnunnar í efstu deild sem nær að opna markareikning sinn fyrir átján ára afmælið.

Það var einmitt methafinn, Ísak Andri Sigurgeirsson, sem er yngsti markaskorari Stjörnunnar í efstu deild, sem lagði upp markið fyrir Adolf. Ísak Andri var aðeins sextán ára og rúmlega níu mánaða þegar hann opnaði markareikning sinn fyrir Stjörnuna.

Markið hjá Adolf Daða þýðir líka að þetta er fimmta árið í röð þar sem Stjörnustrákur skorar fyrir átján ára afmælið sitt.

Sölvi Snær Guðbjargarson náði því bæði sumrin 2018 og 2019, Ísak Andri setti metið sumarið 2020 og Eggert Aron Guðmundsson var bara sautján ára og fjögurra mánaða þegar hann skoraði í fyrra.