Körfubolti

Pavel búinn að fagna sigri í átta undanúrslitaeinvígum í röð

Óskar Ófeigur Jónsson skrifar
Pavel Ermolinskij er einn sigursælasti leikmaður sögunnar í úrslitakeppni karla í körfubolta.
Pavel Ermolinskij er einn sigursælasti leikmaður sögunnar í úrslitakeppni karla í körfubolta. Vísir/Bára Dröfn

Pavel Ermolinskij er kominn í lokaúrslit í áttunda skiptið á ferlinum en nú í fyrsta sinn með Valsmönnum. Pavel datt síðast út í undanúrslitum úrslitakeppninnar fyrir tólf árum síðan.

Pavel hefur fagnað sigri í öllum átta undanúrslitaeinvígum sínum frá og með 2011 tímabilinu með KR.

Pavel féll síðast úr leik í undanúrslitum eftir dramatískt tap á móti Snæfelli í oddaleik 15. apríl 2010.

Hann varð Íslandsmeistari með KR 2011 en fór síðan í tvö ár í atvinnumennsku í Svíþjóð.

Eftir að Pavel kom aftur heim í KR fyrir 2013-14 tímabilið þá unnu KR-ingar sex Íslandsmeistaratitla í röð.

Þetta er þriðja tímabil Pavel með Val. Það fyrsta var engin úrslitakeppni vegna COVID-19 og í fyrra þá datt Valsliðið út í oddaleik í átta liða úrslitum.

Nú sló liðið aftur á móti bikarmeistara Stjörnunnar út í átta liða úrslitum og fylgdi eftir með því að sópa Íslandsmeisturum Þórs úr Þorlákshöfn út í gær.

  • Síðustu níu undanúrslitaeinvígi hjá Pavel Ermolinskij:
  • 2022 með Val: 3-0 sigur á Þór Þorl.
  • 2019 með KR: 3-1 sigur á Þór Þorl.
  • 2018 með KR: 3-1 sigur á Haukum
  • 2017 með KR: 3-1 sigur á Keflavík
  • 2016 með KR: 3-2 sigur á Njarðvík
  • 2015 með KR: 3-2 sigur á Njarðvík
  • 2014 með KR: 3-1 sigur á Stjörnunni
  • 2011 með KR: 3-2 sigur á Keflavík
  • 2010 með KR: 2-3 tap á móti Snæfelli
Subway-deild karla Valur

Mest lesið


Fleiri fréttir

Sjá meira


×

Mest lesið