Mjög vongóður um að fá vinnu á Bæjarins bestu í sumar

Hagskælingar eru að klára vorprófin og við tekur óþreyjufull bið fyrir marga að sjá hvaða menntaskóli vill taka við þeim. Flestir vilja fara í MR, er mat viðmælenda fréttastofu, en einn sem rætt var við var ekki á þeim buxunum.

„Ég er búinn að heyra að mikið af fólki langar í MR eða Versló, en stóri bróðir minn er í MR og sagði við mig að mér langaði ekki að fara þangað. Hann útskýrði fyrir mér að MS væri miklu betri, og nokkrar persónur sem ég þekki vilja fara í MS, svo að ég er bara helvíti sáttur með MS,“ sagði Tryggvi Geir Antonsson, 15 ára. 

Tryggvi greindi einnig frá því að hann væri á lokastigi viðræðna við Bæjarins bestu um að taka að sér stöðu afgreiðslumanns þar um sumarið. Hann hefði töluverðar væntingar um að samningar næðust og lýsti því að í hans tilfelli hlytu allar tekjur að teljast miklar tekjur, enda helstu tekjurnar allajafna tilfallandi tvö þúsund krónur frá foreldrum þegar hann færi út að borða.

„Mig langar að vera með einhverja týpu af pening í sumar og hafa einhverja smá rútínu, annað en í fyrra. Þá var ég bara dauður á því,“ sagði Tryggvi.

Verndun táninga hefur gengið of langt

Tilefni þess að farið var á stúfana um atvinnumál unga fólksins eru heitar umræður sem spruttu af tísti Andrésar Jónssonar almannatengils um að ef til vill hefði verið gengið of langt í að vernda börn frá vinnu.

Farið var eftirfarandi orðum um þau skoðanaskipti í Íslandi í dag: „Eins og margir voru fljótir að benda strax á í svörum við þessu tísti, er Andrés hérna að leggja til að verði tekin upp barnaþrælkun á Íslandi. Hvernig væri að leyfa börnum að vera börn, eins og margir skrifa þarna? Sérðu ekki mikilvægi þess, Andrés, að gefa ungu fólki frelsi á sumrin til þess að njóta lífsins, læra nýja hluti og þroskast sem einstaklingar? Það er úrelt og gamaldags að vera að þvinga ungt fólk til vinnu, enda segja allar rannsóknir okkur núna að það skiptir sérstaklega máli einmitt á þessum aldri að fá allavega 6-7 klukkustundir á dag í næði til að vera á TikTok, 3-4 klukkustundir í PlayStation, 2-3 klukkustundir á YouTube, kannski eina klukkustund í að horfa á klám, og svo frelsi til að hitta vini sína á kvöldin og njóta samveru saman í símunum. Þú getur ekki bara svipt fólk æskunni, það er bara alveg ófyrirséð hvaða áhrif það hefði á unga fólkið okkar. Þessi umræða vakti athygli okkar og við ákváðum að kíkja niður í Hagaskóla, þar sem prófin eru að klárast og ræða við nokkur fórnarlömb barnaþrælkunar, því þau eru þarna úti.“

Innslagið má sjá hér að ofan ásamt viðtölum við Hagskælingana, þessi umfjöllun hefst á tíundu mínútu.