„Vonast til að geta fengið fyrsta leikinn fyrir Ísland“

Runólfur Trausti Þórhallsson skrifar 3. júní 2022 12:01

Þorleifur Úlfarsson vonast til að spila sinn fyrsta leik fyrir Ísland í dag eða á næstu dögum. Vísir/Sigurjón

Þorleifur Úlfarsson, leikmaður Houston Dynamo í MLS-deildinni í Bandaríkjunum er í leikmannahópi U-21 árs landsliðs Íslands sem spilar þrjá leiki á næstu dögum. Hann skoraði sitt fyrsta mark fyrir Houston á dögunum og vonast til að fá að tækifærið til að sýna hvað hann getur með U-21.

Strákarnir hans Davíðs Snorra Jónassonar í U-21 árs landsliði Íslands leika þrjá leiki hér á landi á næstu dögum í undankeppni EM sem fram fer á næsta ári. Ísland er sem stendur í fjórða sæti af sex liðum með 9 stig og möguleikarnir á að komast áfram ekki miklir.

Leikirnir leggjast þó vel í Þorleif sem er að fá sitt fyrsta tækifæri með liðinu.

„Þrír flottir leikir sem við eigum, allir á heimavelli. Getum vonandi sýnt fólkinu hvað við getum og við ætlum okkur að spila þrjá flotta leiki.“

„Maður vonast til að geta fengið fyrsta leikinn fyrir Ísland og bara gaman að geta klætt sig í búninginn,“ bætti Þorleifur við um eigin væntingar.

Þorleifur spilar eins og áður sagði í MLS-deildinni en þangað fór hann eftir að hafa leikið með Duke í háskólaboltanum. Hann skoraði sitt fyrsta mark nýverið og það var af dýrari gerðinni.

„Geggjað að geta skorað í þessari deild. Maður er að vinna sig inn í byrjunarliðið og vonandi get ég skorað fleiri og liðið kemst vonandi í úrslitakeppnina.“

Að lokum var Þorleifur spurður út í deildina í Bandaríkjunum og leið sína að því að verða atvinnumaður.

„Hún er mjög fljót. Mjög mikið upp og niður, mikið af hlaupum. Tæknilega er hún eiginlega alveg eins og ég bjóst við.“

„Þetta er óvenjuleg leið en bara geggjað, þetta hefur verið draumur síðan ég var fjögurra ára,“ sagði Þorleifur að endingu.

Klippa: Þorleifur Úlfarsson

Íslenska U-21 árs landsliðið mætir Liechtenstein í Víkinni klukkan 17.00 í dag. Leikurinn verður í beinni textalýsingu á Vísi.

Fótbolti Landslið karla í fótbolta