„Maðurinn reyndi aug­ljós­lega að drepa okkur. Hvað annað er hægt að kalla þetta?“

Þetta kom fram í viðtali manninn, Mateusz Dariusz, sem ræddi málið við fréttamann RÚV í kvöldfréttum Ríkisútvarpsins í kvöld.

Þar fór hann yfir hvað átti sér stað í gær frá sjónarhóli hans og sex ára gamals sonar hans, sem voru í bíl sem skotmaðurinn í Hafnarfirði í gær skaut tveimur skotum á.

Skotmaðurinn skaut af svölum blokkar á bílinn sem lagt var við leikskóla í norðurbæ Hafnarfjarðar. Þar var Mateusz að skutla syni sínum á leikskólann. Kom fram í viðtalinu að Mateusz og sonur hans væru alltaf mættir aðeins áður en leikskólinn opnar, svo þeir gætu spjallað saman.

„Svo heyrði ég einhvers konar smell,“ sagði Mateusz.

„Fyrst hélt ég að þetta væru hljóð í bílnum, eitthvað væri bilað. Smellurinn var ekki hár en heyrðist vel,“ sagði hann enn fremur.

„Nokkrum sekúndum síðar heyrði ég annan smell en hærri og fann svo glerið rigna yfir bakið og höfuðið á mér,“ sagði Mateusz.

Steig hann þá út úr bílnum til að athuga hvað væri í gangi.

„Þá sá ég mann á svölum með langa byssu sem miðaði á bílinn okkar.“

„Ég byrjaði að hrópa á hann: „Hvað ertu að gera“ og „Hættu þessu!““

„Ég sagðist ætla að hringja á lögregluna sem ég gerði strax.

Segist hann hafa kallað á manninn til að spyrja hvað honum gengi til

„Hann svaraði að hann héldi að ég væri einhver glæpamaður.“

Reynt mjög á feðgana

Kom fram í viðtalinu að málið hafi reynt mjög á son hans. Mateusz hafi meðal annars þurft að öskra á hann að fela sig á gólfi bílsins.

Sagði Mateusz að sonur hans skildi ekki að einhver hafi skotið að bíl þeirra og brotið rúður í honun,

„Hann skilur ekki enn að maðurinn reyndi augljóslega að drepa okkur. Hvað annað er hægt að kalla þetta?“

Hann segist vera í miklu áfalli.

„Ég er enn í miklu áfalli. Mér hefði aldrei dottið í hug að svona nokkuð gæti gerst hérna.“

Héraðsdómur Reykjaness úrskurðaði skotmanninn, karlmann á sjötugsaldri sem var handtekinn var í gær vegna málsins til vistunar á viðeigandi stofnun í fjórar vikur. Skotárásin er rannsökuð sem tilraun til manndráps.

Horfa má á viðtalið á vef RÚV.