Thelma Norður­landa­meistari á slá

Í dag var keppt í úrslitum á einstökum áhöldum á Norðurlandamótinu í áhaldafimleikum og átti Ísland samtals tíu keppendur í úrslitum, þrjá í unglingaflokki og sjö í fullorðinsflokki. Var Thelma þeirra sigursælust en hún er nú Norðurlandameistari á slá. Hún var þó ekki eini Íslendingurinn sem gerði það gott.

Valgarð Reinhardsson átti einnig frábæran dag, en hann keppti á þremur áhöldum: gólfi, hringjum og stökki. Valgarð gerði flottar gólfæfingar og átti tvö frábær stökk en hann hafnaði í öðru sæti á þessum tveimur áhöldum.

Hildur Maja Guðmundsdóttir keppti ásamt Agnesi Suto á gólfi. Hildur Maja sýndi svo sannarlega hvað í henni býr og framkvæmdi glæsilega gólfæfingu með miklu listfengi. Keppnin var mjög hörð á gólfinu þar sem eingöngu munaði 0,05 stigum á milli Hildar og Alva frá Svíþjóð sem sótti sér titilinn, Hildur nældi því í silfur líkt og Valgarð.

Thelma var ekki sú eina sem framkvæmdi frábæra sláarseríu, það gerði einnig Guðrún Edda Min Harðardóttir sem skilaði henni bronsi. sætinu. Keppnin var það hörð á slánni að eingöngu munaði 0,2 stigum á milli Thelmu og Guðrúnar.

Úrslit mótsins má finna hér og hér má sjá myndir frá Fimleikasambandi Íslands.