Bein útsending: Segja Trump enn ógna lýðræðinu í Bandaríkjunum

Þetta er líklegast síðasti opni fundur nefndarinnar en hún hefur fjallað ítarlega um viðleitni Trumps til að snúa úrslitum forsetakosninganna 2020.

Hópur stuðningsmanna Trumps ruddi sér leið inn í þinghús Bandaríkjanna í Washington DC með því markmiði að koma í veg fyrir formlega staðfestingu úrslita forsetakosninganna, sem hann tapaði og hefur aldrei sætt sig við. Frá því hann tapaði kosningunum og jafnvel fyrir kosningarnar hefur Trump ítrekað haldið því fram að umfangsmikið kosningasvindl hafi kostað hann sigur, sem er ekki rétt.

Fulltrúadeildin, sem Demókratar stjórnuðu þá, ákærði Trump fyrir embættisbrot en Repúblikanar í öldungadeildinni komu í veg fyrir að hann yrði sakfelldur.

Hafa rætt við fólk úr innsta hring Trumps

Nærri því þrír mánuðir eru liðnir frá því nefndin hélt síðast opinn fund af þessu tagi. Síðan þá hafa meðlimir nefndarinnar farið yfir gögn frá lífvarðarsveit forsetans, rætt við vitni úr innsta hring Trumps og fleira.

Markmið þessara opnu funda er að koma þeim upplýsingum sem nefndin hefur safnað á framfæri við Bandaríkjamenn en áhorf á þá hefur verið nokkuð mikið.

Sjá einnig: Vissu að það sem þeir báðu Pence um væri ólöglegt

Nefndin var stofnuð af fulltrúadeildinni eftir að Repúblikanar komu í veg fyrir stofnun óðháðrar rannsóknarnefndar vegna árásarinnar á þinghúsið. Leiðtogar Demókrataflokksins í fulltrúadeildinni neituðu svo því að tveir ötulir stuðningsmenn Trumps fengju sæti í nefndinni, eins og leiðtogar Repúblikana kröfðust. Þess í stað tóku þau Liz Cheney og Adam Kinzinger sæti í nefndinni en bæði hafa verið gagnrýnin á Donald Trump vegna árásarinnar.

Sjá einnig: Trump vildi leiða vopnaða stuðnings­menn að þing­húsinu

Trump og bandamenn hans í Repúblikanaflokknum hafa beitt sér gegn þeim af mikilli hörku en Kinzinger ætlar að hætta á þingi og Liz Cheney var sigruð í forvali Repúblikanaflokksins í Wyoming. Trump hefur tekist að bola svo gott sem öllum andstæðingum sínum innan Repúblikanaflokksins á brott.

Segja Trump enn nota sama málflutning

Í frétt Wall Street Journal segir að nefndin muni koma niðurstöðum sínum á framfæri í kvöld en engin vitni munu tala á fundinum. Þess í stað verða sýnd myndbönd af viðtölum við vitni og munu allir níu meðlimir nefndarinnar ræða rannsókn þeirra.

Politico hefur eftir Cheney að nefndin ætli að sýna hvernig Trump hafi ítrekað notað sama málflutning leiddi til árásarinnar á þinghúsið og það hafi færst í aukana. Vísaði hún meðal annars til nýlegra ummæla dómara sem gagnrýndi háttsetta Repúblikana fyrir fylgispekt þeirra í garð Trumps og sagði þá lafandi hrædda við hann.

Sjá einnig: Skaut fast á Repúblikana fyrir fylgispekt þeirra við Trump

Bandarískir saksóknarar eru einnig með árásina á þinghúsið og aðkomu Trumps að henni til rannsóknar.

Fundurinn hefst klukkan fimm og má fylgjast með honum í beinni útsendingu hér að neðan.