Íslandsbankaskýrslan loks komin í umsagnarferli

Atli Ísleifsson skrifar 13. október 2022 13:22

Guðmundur Björgvin Helgason gegnir embætti ríkisendurskoðanda. Vísir/Vilhelm

Ríkisendurskoðun hefur nú sent fjármála- og efnahagsráðuneyti, Bankasýslu ríkisins og stjórn hennar drög að skýrslu embættisins um sölu ríkisins á hlut sínum í Íslandsbanka til umsagnar. Ríkisendurskoðun hefur veitt aðilum frest til miðvikudagsins 19. október til að skila umsögnum.

Greint er frá þessu á vef Ríkisendurskoðunar, en skýrslunnar hefur verið beðið með mikilli eftirvæntingu eftir að tilkynnt var um að ráðist yrði í gerð hennar. Skýrslan ber heitið „Sala á hlut ríkisins í Íslandsbanka 22. mars 2022“.

Ríkisendurskoðun áréttar á heimasíðu sinni að trúnaður gildir um umsagnardrög skýrslunnar, sem teljist vinnuskjal í skilningi laga um ríkisendurskoðanda og endurskoðun ríkisreikninga.

„Um skýrsludrögin verður því ekki fjallað efnislega í umsagnarferlinu, hvorki af hálfu Ríkisendurskoðunar né umsagnaraðila,“ segir á vef embættisins.

Óskaði eftir gerð skýrslunnar 7. apríl

Bjarni Benediktsson fjármála- og efnahagsráðherra óskaði eftir því þann 7. apríl síðastliðinn að Ríkisendurskoðun myndi gera úttekt á því hvort sala á 22 prósenta hlut ríkisins í Íslandsbanka hafi samrýmst lögum og góðum stjórnsýsluháttum.

Degi síðar var svo greint frá því í tilkynningu frá Ríkisendurskoðun að stofnunin myndi verða við beiðni ráðherra um úttekt. Var þá sagt að niðurstöður úttektarinnar yrðu birtar í opinberri skýrslu til Alþingis í júnímánuði. Verulegar tafir urðu á því þar sem ríkisendurskoðandi sagði verkið hafa reynst mun umfangsmeira ef fyrirfram var gert ráð fyrir. Þá hafi Covid og sumarfrí starfsmanna embættisins sett strik í reikninginn.

Ríkissendurskoðandi sagði í samtali við fréttastofu í byrjun síðasta mánaðar að hann sagðist vita að skýrslan muni „vekja athygli og fá umtal.“

Salan á Íslandsbanka Íslenskir bankar Íslandsbanki Ríkisstjórn Katrínar Jakobsdóttur Alþingi

Tengdar fréttir

„Þetta voru losaraleg tímamörk“

Almenningur þarf enn að bíða eftir Íslandsbankaskýrslunni. Nú er gert ráð fyrir því að skýrslan verði gerð opinber í október en í upphafi var stefnt að því að skýrslan fengi að líta dagsins ljós í júní. Yfirferð Ríkisendurskoðunar hefur tekið töluvert meiri tíma en áætlað var í upphafii en íkisendurskoðandi segir að töfin eigi sér málefnalegar skýringar.

26. september 2022 18:51

Stjórnsýsluúttekt á lokametrunum sem muni „vekja athygli“

Úttekt ríkisendurskoðunar á sölu á hlut ríkisins í Íslandsbanka er á lokametrunum og styttist mjög í að hún fari í umsagnarferli. Guðmundur Björgvin Helgason, ríkisendurskoðandi, treysti sér ekki til að nefna dagsetningu í þessu samhengi en sagði ljóst að úttektin verði tilbúin fyrir lok þessa mánaðar.

6. september 2022 15:37

Bjarni ekki stressaður fyrir skýrslunni um Íslandsbanka

Fjármálaráðherra kveðst enn þeirrar skoðunar að íslenska ríkið eigi að selja þann 100 milljarða króna hlut sem það á eftir í Íslandsbanka. Hann segir að færð hafi verið ágæt rök fyrir því að rannsókn Ríkisendurskoðunar hafi tekið sinn tíma og vonast eftir uppbyggilegum ábendingum úr væntanlegri skýrslu.

11. september 2022 16:01

Rannsakar hlutabréfaviðskipti dagana fyrir útboð Íslandsbanka

Rannsókn Fjármálaeftirlits Seðlabanka Íslands á starfsháttum ráðgjafa fjármálafyrirtækja við sölu á hlutum ríkisins í Íslandsbanka fyrr á árinu beinist meðal annars að mögulega óeðlilegum viðskiptum á hlutabréfamarkaði yfir tveggja daga tímabil áður en útboðið kláraðist. Eftirlitið hefur kallað eftir ítarlegum gögnum frá söluráðgjöfunum um samskipti þeirra við viðskiptavini sína dagana 21. og 22. mars síðastliðinn.

28. september 2022 07:00

Mest lesið

Fleiri fréttir