Vilja afnema úrslitakeppnina strax

Í Noregi virkar úrslitakeppnin þannig að fjögur efstu liðin í tíu liða deild fara í úrslitakeppni um norska meistaratitilinn og sæti í Meistaradeild Evrópu. Þau fá hins vegar ekki að taka öll stigin sín úr venjulegu deildarkeppninni með sér, heldur fær efsta liðið 6 stig, næsta lið 4 stig, þriðja liðið 2 stig og neðsta liðið 0.

Samkvæmt frétt Nettavisen fer því fjarri að allir séu ánægðir með þetta nýja fyrirkomulag og nú vilja forráðamenn Vålerenga, sem er í 2. sæti en fimm stigum á eftir Brann, að farið verði aftur í gamla fyrirkomulagið.

„Við munum berjast fyrir því að frá þessu verði gengið á ársþinginu í mars á næsta ári,“ segir í yfirlýsingu frá Vålerenga en samkvæmt dagskrá sem norska knattspyrnusambandið sendi nýlega frá sér er gert ráð fyrir því að úrslitakeppnin haldi áfram á næstu leiktíð.