Guðlaugur Þór segir Bjarna fyrstum allra ef hann býður sig fram

Fyrsti landsfundur Sjálfstæðisflokksins í fjögur ár vegna faraldursins fer fram frá föstudegi til sunnudags í næstu viku. Bjarni Benediktsson hefur verið formaður flokksins frá 2009 og býður sig fram til endurkjörs en svo gæti farið að Guðlaugur Þór Þórðarson bjóði sig einnig fram. Hann segir marga Sjálfstæðismenn hafa áhyggjur af stöðu flokksins.

„Skoðanakannanir eru eitt og auðvitaðsveiflast þær. Þær hafa ekki verið jákvæðar mjög lengi en aðalatriðið, og skoðanakannanir skipta máli, er auðvitað niðurstaða kosninga. Það vita allir hvernig þau mál hafa þróast,“ segir Guðlaugur Þór og vísar þar til fyrri tíðar þegar Sjálfstæðisflokkurinn gat vænst þess að fá allt að 40 prósent atkvæða.

„Við erum öll sammála um þetta Sjálfstæðismenn. Ég held reyndar að það séu fleiri flokkar sammála um að þeir vildu gjarnan hafa meira fylgi. En það bara er ekkert eins og það var í sjálfu sér. Þú getur ekki beðið um að snúa klukkunni aftur í tímann. Síðan finnst mér líka að það verði hver að líta sér nær og spyrja sig, til dæmis oddvitinn í Reykjavík í þessu tilviki; hvernig hefur mér gengið að afla flokkum fylgi í borginni,“ segir Bjarni.

Í alþingiskosningum fyrir ári fékk Sjálfstæðisflokkurinn 24,4 prósent atkvæða á landsvísu. Honum gekk best í kjördæmi Bjarna með 30,2 prósent en fékk 20,9 prósent í kjördæmi Guðlaugs Þórs. Það var eina kjördæmið þar sem flokkurinn tapaði manni milli kosninga.

Þegar stjórnarsáttmáli núverandi ríkisstjórnar var kynntur sagði Bjarni að Jón Gunnarsson yrði dómsmálaráðherra í átján mánuði. Að þeim loknum tæki Guðrún Hafsteinsdóttir við. Nýlega sagði hann hins vegar að svo gæti farið að Jón sæti áfram þótt Guðrún kæmi inn.

„Ég get ekki lagt neitt út af því. Það liggur hins vegar alveg fyrir að það er ekkert verið að fjölga ráðherrum og ég held að það skipti máli að hafa enga óvissu í þessu,“ segir Guðlaugur Þór.

Bjarni segir ekkert hafa breyst varðandi komu Guðrúnar Hafsteinsdóttur í ríkisstjórn.

„Ég myndi líka vilja hafa það á hreinu hvernig mín staða verður eftir nokkra daga. Mér fannst bara komið ágætt af umræðum um að Jón Gunnarsson væri að hætta. Hann er í miðjum straumnum, með stór mál á dagskrá og mér finnst sjálfsagt að hann fái frið til að sinna sínum verkefnum. Hann hefur staðið sig afar vel.“

Ertu sigurviss sjálfur?

„Mér líður vel með það sem ég er að gera. Ég er með tilhlökkun að koma til fundar við fólk og leggja okkar verk á borð og sækjast eftir umboði á forsendum þess sem við höfum verið að vinna að með þann árangur í farteskinu sem við höfum skilað,“ segir formaðurinn.

En hvenær liggur ákvörðun Guðlaugs Þórs fyrir?

„Ef ég myndi taka það skref, sem er mjög stórt skref af mörgum ástæðum, mun ég ekki tilkynna það í fjölmiðlum. Ég mun ræða það við formann flokksins Bjarna Benediktsson. Hann mun ekki sjá það, ef það gerist, í fjölmiðlum.“

Þannig að við fjölmiðlar þurfum að hafa auga með þér næstu daga?

„Já endilega,“ segir Guðlaugur Þór Þórðarson og skellir upp úr.