SGS og Samtök atvinnulífsins undirrituðu kjarasamning í húsakynnum ríkissáttasemjara um síðustu helgi. Formaður Eflingar og formaður VR hafa gagnrýnt samningagerðina en formaður SGS svarað fullum hálsi. Atkvæðagreiðsla um samninginn er rafræn, hófst í dag og stendur til 19. desember. Verði samningurinn samþykktur er víst að hann verður leiðandi við gerð samninga við önnur verkalýðsfélög.
Töluverður titringur er vegna atkvæðagreiðslunnar því fjölmennasta félagið í SGS, Efling, er ekki aðili að samningum ásamt Verkalýðsfélagi Grindavíkur. Hávær orðrómur hefur verið um að áhrifafólk innan Eflingar hafi verið að hringja í forystufólk innan þeirra félaga sem eru aðilar að samningnum til að hvetja fólk til að greiða atkvæði á móti honum.
Fréttastofa hafði samband við þrjá formenn af þeim sautján félögum innan SGS sem sömdu við SA. Formennirnir höfðu allir heyrt af orðróminum. Enginn hafði upplýsingar frá fyrstu hendi og einn neitaði að trúa honum nema sönnur yrðu færðar fram.
Sólveig Anna Jónsdóttir, formaður Eflingar, segir félagið ekki aðhyllast slík vinnubrögð.
„Það er alls ekki svo að Stéttarfélagið Efling sé að rekja áróður við félagsfólk í öðrum félögum að fella samninginn. Við aðhyllumst ekki slík vinnubrögð og höfum enga þörf til að hegða okkur með slíkum lágkúrulegum hætti,“ segir Sólveig Anna.
Meirihluti stjórnar Eflingar samþykkti í dag ályktun þess efnis að launahækkanir í samningi SGS væru ófullnægjandi fyrir verkafólk Eflingar á höfuðborgarsvæðinu og suðvesturhorninu.
Ályktunina má sjá að neðan.
Launahækkanir í samningi Starfsgreinasambandsins (SGS) eru að mati Eflingar ófullnægjandi fyrir verkafólk á höfuðborgarsvæðinu og suðvesturhorninu.
Kaupmáttarrýrnun ársins 2022 er óbætt í samningnum. Hann mun auk þess ekki skila sambærilegri kaupmáttaraukningu á næsta ári og Lífskjarasamningurinn gerði. Er hér miðað við fyrirliggjandi verðbólguspár (um 6%).
Þá er ekki tekið tillit til þess að hagvöxtur var einungis um 2,4% við undirritun Lífskjarasamningsins árið 2019. Hagvöxtur er nú miklu hærri eða nálægt 7%. Miklu meira er því til skiptanna nú. Launafólk á að fá sinn hlut af þessum mikla hagvexti.
Kauphækkun í SGS-samningnum er mest í þeim hópum verkafólks sem hefur lengstan starfsaldur hjá sama fyrirtæki. Eflingarfélagar eru almennt með styttri starfsaldur hjá sama fyrirtæki og fengju því minna út úr launatöflu SGS en verkafólk á landsbyggðinni. Þá virðist SGS-samningurinn vera ásættanlegri fyrir fiskvinnslufólk en aðra, en sá hópur er að mestu leyti á landsbyggðinni en hverfandi hluti Eflingar-fólks á suðvestur horninu.
Þá er framfærslukostnaður mun meiri á höfuðborgarsvæðinu, einkum húsnæðiskostnaður. Nýr kjarasamningur fyrir Eflingarfélaga þarf að taka tillit til þessara atriða.
Sólveig Anna segir gagnrýni Eflingar málefnalega. Þau finni styrk sinn í fólkinu sínu og standi ekki í því að grafa undan öðrum.
„Langflestir jákvæðir“
Hrund Karlsdóttir er formaður Verkalýðs- og sjómannafélags Bolungarvíkur. Félagið er fámennt, aðeins 140 sem hafa atkvæðarétt um samninginn. Hrund hafði heyrt af orðróminum en ekkert sem hönd væri á festandi. Aðspurð um viðhorf hennar félagsmanna til samnings SGS við SA segir hún að hljóðið sé bara mjög gott.
„Ég held að fólk sé almennt ánægt,“ segir Hrund.
Guðbjörg Kristmundsdóttir, formaður Verkalýðs- og sjómannafélags Keflavíkur og nágrennis, talar á svipuðum nótum. Hún hafi heyrt orðróminn en ekkert staðfest.
„Ég bara trúi því ekki, eða vill ekki trúa því. Ég kýs að trúa því ekki þar til ég fæ sannanir þess efnis.“
5500 manns eru í félaginu og stærstur hluti vaktavinnufólk.
„Þessi samningur er fínn fyrir þann hóp, og eins fiskvinnsluna. Langflestir eru jákvæðir,“ segir Guðbjörg.
Funda um samninginn
Guðrún Elín Pálsdóttir er formaður Verkalýðsfélags Suðurlands. Eins og kollegar hennar hefur hún heyrt orðróm.
„En það hefur enginn hjá mér komið til mín með svona skilaboð. Þetta er orðrómur,“ segir Guðrún Elín.
Um 1500 manns eru í félaginu sem fundaði í gær vegna samninganna. Fram undan er annar fundur í næstu viku.
„Það er ekkert annað en gott hljóð í fólki og ekki að heyra að það sé á þeirri blaðsíðu að fella samninginn. Maður veit ekki hvað fólk gerir þegar komið er inn í kosningaklefann en það er ekki okkar tilfinning að samningurinn verði felldur.“
Þessa stundina standa yfir viðræður hjá ríkissáttasemjara milli fulltrúa Samtaka atvinnulífsins annars vegar og samflots VR, LÍV og iðnaðar- og tæknimanna. Fundur hófst klukkan tíu í morgun og stendur enn.
