Jordan kaupir hlut í ensku úr­vals­deildar­liði

Jordan spratt upp á stjörnuhiminn árið 2015 þegar hann fór með hlutverk Adonis Creed í samnefndri kvikmynd, Creed. Hann lék þar son Apollo Creed, fyrrum andstæðing og félaga Rocky Balboa úr Rocky-kvikmyndaseríu Sylverster Stallone. Stallone lék gegn Jordan sem Rocky í myndinni, en Creed II kom út árið 2018 og þriðja myndin í seríunni kemur út á næsta ári þar sem Jordan mun þreyta frumraun sína í leikstjórastólnum.

Hann er einnig þekktur fyrir hlutverk sitt sem Erik Killmonger í Black Panther kvikmyndunum og þá átti hann hlutverk í HBO-seríunni The Wire í æsku.

Bournemouth tilkynnti í dag að Jordan væri nýr hluthafi í félaginu en liðið er nýliði í ensku úrvalsdeildinni. Bournemouth situr þar í 14. sæti, þremur stigum frá fallsæti. Liðið tapaði 9-0 fyrir Liverpool snemma í mótinu og var Scott Parker, sem kom liðinu upp, rekinn úr stjórastólnum.

Gary O'Neil tók við liðinu af Parker og hefur tekist að snúa gengi liðsins við, þó það sé enn í fallbaráttu. Liðið mætir Chelsea í fyrsta leik eftir HM-pásu, þann 27. desember.