„Það er ekki hægt að taka nokkurt einasta mark á þessu fólki“

Jóhann Páll Jóhannsson, þingmaður Samfylkingarinnar, var meðal þeirra fjölmörgu þingmanna stjórnarandstöðunnar sem gagnrýndu bandorminn þegar önnur umræða fór fram eftir hádegi í dag.

„Í honum birtist afleit forgangsröðun í skattamálum, vond skattapólitík, þar sem farin er sú leið að varpa öllu aðhaldinu á tekjuhlið ríkisfjármála yfir á almenning, meðal annars í formi hækkunar á flötum krónutölugjöldum sem er fram úr öllu hófi,“ sagði Jóhann.

Þetta tók Þórhildur Sunna Ævarsdóttir, þingmaður Pírata undir. Bentu þau bæði á að umsagnaraðilar höfðu lagst gegn miklum hækkunum á krónutölugjöldum en slíkt myndi ýta undir verðbólgu.

„Að velta ábyrgðinni á verðbólguna svona yfir á almenning og sér í lagi tekjulægri hluta landsmanna er hvorki gáfulegt né sanngjarnt,“ sagði Þórhildur Sunna.

Vísaði gagnrýni á bug og benti á sveitarfélögin

Þau voru ekki ein um það að gagnrýna bandorminn en Bergþór Ólafsson, þingmaður Miðflokksins, sagði til að mynda útgjaldaaukningu ríkissjóðs stjórnlausa, Ásthildur Lóa Þórsdóttir, þingmaður Flokks fólksins sagði engan skilning hjá ríkisstjórninni á erfiðri stöðu heimila, og Guðbrandur Einarsson, þingmaður Viðreisnar, sagði þá sem verst standa í samfélaginu taka á sig mestar byrðar. 

Bjarni Benediktsson fjármálaráðherra svaraði og sagði ríkisstjórnina hafa haldið aftur hækkunum í mörg ár. Eftir að ákveðið var að hækka gjöldin í takt hafi borið á gagnrýni hjá fulltrúum minnihlutaflokkanna.

„Sömu flokkar og byrjuðu árið á því að hækka mun meira heldur en ríkisstjórnin, eða um fjögur og hálft prósent og hækkuðu um fjögur og hálft prósent fyrsta september, eru alls staðar í sveitarstjórnum að hækka gjaldskrár sínar í takt við verðlag en koma svo inn á þing og segja það algjöra skömm,“ sagði Bjarni.

„Það er auðvitað svo holur málflutningur sem fylgir þessu framferði að það er ekki hægt að taka nokkurt einasta mark á þessu fólki,“ sagði hann enn fremur. 

Samfylkingin ætti sjálf að taka ábyrgð

Jóhann Páll gaf lítið fyrir þessi rök og benti á að sveitarfélögun hefðu ekki þá tekjustofna sem ríkið búi yfir.

„Það er hjákátlegt að hlusta á hæstvirtan fjármálaráðherra benda svo á þau og segja: sjáið þið bara, þau eru að hækka gjöld. Þess vegna skulum við gera það af sama krafti og jafnvel gefa enn frekar í. Þetta er versti mögulegir tíminn til að hækka flöt krónutölugjöld, sem leggjast þyngst á tekjulægstu heimili landsins, upp í rjáfur,“ sagði Jóhann.

Kristrún Frostadóttir, formaður Samfylkingarinnar, tók í sama streng og sagði stærsta ástæðuna fyrir hallanum á sveitarstjórnarstiginu væri vanfjármögnun ríkissjóðs undir stjórn fjármálaráðherra. Þá hefðu sveitarfélögin ekki umboð til skattlagninga líkt og ríkið.

Ráðherrann nýtti þá tækifærið að hnýta í Samfylkinguna, sem er í meirihluta í Reykjavík.

„Að tala fyrir því núna, þegar Seðlabankinn er tíu sinnum í röð búnir að hækka vexti og við erum að reka ríkissjóð með halla, að við eigum áfram að vera að beita skattalækkun í gegnum krónutölugjöld og skatta, það er bara mikið ósamræmi í þeim málflutningi. Samfylkingin á bara að taka ábyrgð á því að hún hækkar um verðlag annars staðar eins og við erum að tala um að gera hér,“ sagði Bjarni.