Pavel nýr þjálfari Tindastóls

Vladimir Anzulovic var sagt upp störfum á Sauðárkróki á dögunum þar sem gengi liðsins hefur ekki verið talið ásættanlegt í Subway deildinni í vetur en Vladimir tók við liðinu síðastliðið haust.

Pavel er einn sigursælasti körfuboltamaður landsins og þrautreyndur landsliðsmaður en þetta er hans fyrsta starf sem aðalþjálfari.

„Pavel er annálaður körfuboltaheili fyrir utan alla hæfileika hans inni á vellinum. Hann er án efa einn allra sigursælasti körfuknattleiksmaður sem Ísland hefur átt og er að okkar viti mikill happafengur fyrir Tindastól á þessum tímapunkti. Ég er sannfærður um að hann eigi eftir að koma með öfluga nýja og ferska vinda inn í liðið okkar á næstu mánuðum,“ segir Dagur Þór Baldvinsson, formaður körfuknattleiksdeildar Tindastóls í tilkynningu deildarinnar.

Í tilkynningunni kemur fram að Pavel muni flytjast búferlum á Sauðárkrók ásamt fjölskyldu sinni.

„Ég kynntist íslenska körfuboltanum fyrst í Borgarnesi og hef alla tíð síðan dáðst að þessari stemningu sem sum bæjarfélög úti á landi hafa náð að skapa í kringum körfuna. Tindastóll hefur í gegnum árin alltaf verið einn af stóru andstæðingunum og það hefur alltaf verið gaman að koma hingað á Krókinn og takast ekki bara á við frábæra leikmenn heldur stemninguna í stúkunni á hverjum einasta leik,“ er haft eftir Pavel.

„Ég hef alltaf dáðst að þessu liði og það verður ótrúlega skemmtilegt að hafa stúkuna hér á Sauðarkróki loksins með sér en ekki á móti. Tindastóll á ennþá eftir að landa þeim stóra, sjálfum Íslandsmeistaratitlinum, og það er mikill heiður fyrir mig að fá að blandast núna í þann stóra hóp sem vonandi mun gera þann draum að veruleika sem allra fyrst,“ segir Pavel.