Þjálfari Lakers gerir lítið úr rifrildinu við Doncic

Þegar Doncic var tekinn af velli í 1. leikhluta í leik Golden State Warriors og Lakers á laugardaginn virtist hann hunsa Redick. Þjálfarinn gekk þá til slóvensku stjörnunnar og þeir áttu í einhverjum orðaskiptum sem virtust ekki á vinsamlegu nótunum.

Myndband af uppákomunni fór í dreifingu á samfélagsmiðlum, eitthvað sem Redick botnar ekkert í.

„Þetta var mjög venjulegt,“ sagði Redick. „Ég hugsaði ekki mikið um þetta á þeim tíma og ég held að sömu sögu sé að segja af Luka.“

Lakers vann leikinn gegn Golden State, 101-129, og hefur unnið þrjá leiki í röð. Liðið er í 6. sæti Vesturdeildar NBA.

Doncic skoraði 26 stig, tók sex fráköst og gaf átta stoðsendingar í leiknum gegn Golden State. Hann er stigahæstur í NBA í vetur með 32,4 stig að meðaltali í leik og þriðji stoðsendingahæstur í deildinni með 8,6 slíkar að meðaltali í leik.