Fötluð kona föst í flug­vél með stífluðu klósetti

Aftakaveður er á Keflavíkurflugvelli og hafa farþegar á leið til landsins ýmist þurft að bíða í marga klukkutíma í flugvélum eða inni í flugstöðinni með engar töskur. Búið er að aflýsa öllu flugi til Norður-Ameríku og Evrópu fyrir utan flug til Osló og Kaupmannahafnar sem hefur verið seinkað fram á kvöld. 

Fulltrúar Icelandair hurfu

Fréttastofa ræddi við nokkra farþega sem sitja fastir í komusal Keflavíkurflugvallar. Einhverjir þeirra bíða eftir fólki sem enn er fast í vélunum og aðrir bíða eftir töskunni sinni. Sumir hafa verið að bíða síðan klukkan sex í morgun. 

„Ég er að eiga í miklum erfiðleikum með að finna fulltrúa. Ég fann einn fulltrúa í dag frá Icelandair, ég bókaði með þeim vetrarferð, flug, hótel, rútu og allt. Nú er búið að aflýsa fluginu og ég finn ekki neinn til að veita mér upplýsingar,“ segir Tom Johnson sem er á leið aftur heim til Washington D.C. í Bandaríkjunum.

Hann nær ekki að hringja í flugfélagið þar sem það virkar ekki að hringja úr símanum hans. Hann fær þó skilaboð og getur sent skilaboð. Þá finnur hann hvergi síma á flugvellinum til þess að reyna að bóka sér far aftur til Reykjavíkur. Hann segist hafa séð fulltrúa á vellinum þegar hann mætti en um leið og fluginu var aflýst hurfu þeir allir. 

Taskan ekki komin eftir tíu tíma bið

Steven Owens er nú á vellinum að bíða eftir töskunni sinni. Hann hefur beðið í komusal vallarins og við töskuafhendinguna í rúmlega tíu klukkutíma en hann lenti hér á landi klukkan sex í morgun. Hann segir allt hafi byrjað við lendinguna. 

„Við lentum og runnum við lendinguna, það var eins og vélin væri að „drift-a“. Helmingnum af farþegunum var hleypt út og þegar við vorum komin út var okkur sagt að hinn helmingurinn yrði eftir. Ég held að þeim hafi verið hleypt út nokkrum tímum síðar en við erum ekki enn komin með töskurnar okkar,“ segir Steven í samtali við fréttastofu. 

Misvísandi upplýsingar

Hann segist ekki hafa heyrt neitt frá flugfélaginu en hann hefur náð að ræða við starfsmenn í þjónustuveri flugvallarins. Þaðan hefur fólk þó fengið afar misvísandi upplýsingar. 

„Það var smá ruglingslegt sem þau sögðu að við mættum gera. Við mættum fara til að ná í mat en við gætum ekki komið til baka til að ná í töskurnar. Þau sögðu að þau gætu ekki sent töskurnar okkar á hótelið en síðan sögðu þau að þau gætu gert það. Þeir hafa verið að breyta hverju þau segja og segja mismunandi hluti við mismunandi fólk,“ segir Steven. 

Hann segir fólk á vellinum vera orðið frekar pirrað og óþreyjufullt. Nú sé kominn tími til að ákveða hvort þau haldi áfram að bíða eftir töskunum eða fari heim og vonist eftir því að töskurnar týnist ekki. 

Fötluð um borð í tíu tíma

Jerra Dimalik kom hingað frá Miami og er stödd á vellinum ásamt Mohammed sem býr hér á landi. Fötluð vinkona þeirra er föst í vél Icelandair og hefur verið þar í tíu klukkutíma. 

„Hún er búin að vera þarna í tíu tíma og klósettin eru stífluð,“ segir Jerra. „Hún er föst og sagði mér að ástandið væri svo slæmt. Það er vond lykt þarna, enginn matur, ekki neitt. Hún sagði mér að það væri veikt fólk um borð. Þetta er virkilega slæmt ástand,“ segir Mohammed.