Seðlabankinn segir þjóðaröryggi kalla á íslenska greiðslumiðlun

Íslendingar greiða að lang mestu leyti fyrir alla vöru og þjónustu með greiðslukortum. Um nokkurt skeið hafa stærstu greiðslumiðlunarfyrirtækin alfarið verið í eigu erlendra aðila og fara greiðslur því fram í gegnum netþjóna þeirra. Seðlabankinn hefur hvatt til þess í allnokkur misseri að komið verði upp íslenskri greiðslumiðlun og unnið að undirbúningi þess.

Á kynningarfundi fjármálastöðugleikanefndar í gær mátti greina að þolinmæði bankans í þessum efnum væri á þrotum. Gunnar Jakobsson staðgengill formanns nefndarinnar sagði að niðurstaða yrði að fást í málið á næstu vikum eða óska ella eftir lagasetningu um málið.

„Ef það yrðu sett lög myndi það fela í sér að íslenska fjármálakerfið, bankarnir, hefðu í rauninni lagaskyldu til að koma upp óháðri innlendri smágreiðslulausn eins og það heitir. Koma þá með lausnir sem duga,“ segir Ásgeir.

Seðlabankinn hafi verið að reyna aðendurskipuleggja fjármálainnviði landsins, meðal annars með Reiknistofu bankanna, sem í dag væri kölluð RB. Þessari vinnu þyrfti að koma áfram.

„Það skiptir okkur líka máli að greiðsluþjónusta á Íslandi sé örugg og hagkvæm. Við kannski þurfum að ná aukinni skilvirkni þarna,“ segir seðlabankastjóri.

Seðlabankinn gaf út skýrslu um málið í síðasta mánuði en þar segir meðal annars:

„Núverandi högun rafrænnar greiðslumiðlunar á Íslandi er talin ógna þjóðaröryggi. Traust og örugg greiðslumiðlun er ein undirstaða virkni hagkerfisins og efnahagslegrar velsældar. -  Rúmlega 90% innlendrar smágreiðslumiðlunar fara fram með greiðslukortum (debet- og kreditkortum sem nýta erlenda innviði.“

„Við hefðum kannski viljað sjá ákveðin skref stigin að hálfu bankanna til þess að koma þessu upp.“ Málið snúist líka um aukna hagkvæmni fyrir íslenska kortanotendur og aukið öryggi,“ segir seðlabankastjóri sem jafnframt er formaður fjármálastöðugleikanefndar.

„Við viljum alla vega gera okkar ráðstafanir. Til að tryggi það að við höfum fulla stjórn á okkar greiðslumiðlun. Ég held aðreynslan frá 2008 undirstriki það. Það er mjög erfitt fyrir okkur að vera háð útlöndum hvað varðar greiðslumiðlun þegar það eru viðskipti á milli innlendra aðila,“ segir Ásgeir Jónsson.