Hinir gömlu vinna á meðan þeir ungu rölta um bæinn

Valsmenn æfðu í keppnishöllinni í morgun eftir að hafa lent í Þýskalandi í gærkvöld. Þegar fréttamenn Vísis bar að garði á hótel þeirra rétt utan Göppingen voru þar eldri leikmenn liðsins að sinna fjarvinnu á meðan margir yngri nýttu tímann í bæjarferð.

Fyrirliðinn Alexander Örn Júlíusson, Bergur Elí Rúnarsson og Finnur Ingi Stefánsson sátu þá allir við störf á hótelinu á meðan aðrir spókuðu sig í bænum. Björgvin Páll Gústavsson var þá kominn niður að vinna síðar um daginn.

„Þessi eldri kynslóð er með vinnu heima líka og börn heima, þannig að við notum tímann vel til þess að koma einhverju í verk á góðum mánudegi í Þýskalandi,“ segir Björgvin Páll við Vísi.

Strákarnir áttu svo taktíkurfund seinni partinn í dag og liðið æfir aftur í keppnishöllinni í fyrramálið.

Leikurinn hefst klukkan 18:45 og verður sýndur beint á Stöð 2 Sport. Vísir mun fylgja liðinu eftir fram að leik og gera allt saman vel upp að honum loknum.