Slökkvistarf stendur enn yfir í húsi við gamla slippinn í Hafnarfjarðarhöfn eftir að upp kom mikill eldur fyrr í kvöld.
Allt tiltækt slökkvilið var kallað út en að sögn slökkviliðsins er húsið nú að mestu brunnið. Enn loga þó glæðar í húsinu og munu slökkvistörf standa fram á nótt.
Reykurinn frá húsinu sást víða og voru töluvert margir íbúar mættir að svæðinu til að fylgjast með störfum slökkviliðs.
Vilhelm Gunnarsson, ljósmyndari Vísis var á staðnum og myndaði slökkviliðsmenn að störfum í Hafnarfirði í kvöld.
Gunnlaugur Jónsson aðstoðarvarðstjóri hjá slökkviliðinu á höfuðborgarsvæðinu, segir slökkviliði ekki kunnugt um það hvort einhver hafi verið í húsinu sem brann í stórbruna við Hafnarfjarðarhöfn í kvöld. Slökkvistörfum mun ekki ljúka fyrr en í nótt og eru íbúar beðnir um að loka gluggum ef til þarf vegna reyksins.
Mikill eldur er nú í gamla slippnum við Hafnarfjarðarhöfn í Skipalóni. Sést reykmökkurinn vel úr fjarlægð meðal annars úr Urriðaholti í Garðabænum. Húsið hefur staðið autt í þó nokkurn tíma og stóð til að rífa það.
