Helgi hættir með Grindavík

Fótbolti.net greinir frá því að Helgi muni hætta með Grindavík og samið verði um starfslok við hann síðar í dag. Um er að ræða sameiginlega ákvörðun Helga og Grindavíkur.

Helgi tók við Grindavík fyrir tímabilið. Liðið fékk sterka og reynda leikmenn til sín og byrjaði tímabilið af krafti og sló meðal annars Val út úr Mjólkurbikarnum.

Síðan seig á ógæfuhliðina og Grindavík hefur tapað fjórum af síðustu fimm deildarleikjum sínum og gert eitt jafntefli.

Helgi stýrði Grindvíkingum í síðasta sinn þegar þeir steinlágu fyrir grönnum sínum úr Njarðvík, 4-1, á laugardaginn.

Grindavík er í 10. sæti lengjudeildarinnar með fimmtán stig, fjórum stigum frá fallsæti.