„Fram að fyrsta markinu fannst mér þetta nokkuð jafnt“

Leikurinn var jafn og spennandi á upphafsmínútum en Valsmenn tóku fljótlega stjórnina og komust tveimur mörkum yfir áður en flautað var til hálfleiks. Rúnar segist heilt yfir ánægður með frammistöðu sinna manna, en játar sig sigraðan gegn betri andstæðing.

„Mér fannst við ná að pressa þá vel og koma þeim í vandræði í uppspilinu þeirra úr öftustu línu. Svo skora þeir, 1-0 og svo í kjölfarið 2-0 rétt fyrir hálfleik sem var slæmt að fá, eftir það var þetta bara mjög erfitt. Ég er samt ánægður að strákarnir, þeir héldu áfram fram á síðustu mínútu að reyna og lögðu á sig vinnu en við töpuðum bara fyrir betra liði, einfalt.“

Eftir að hafa lent tveimur mörkum undir á lokamínútu fyrri hálfleiks færði KR liðið sig ofar á völlinn til að freista þess að minnka muninn. En pressa liðsins var heldur máttlaus og það reyndist Valsmönnum auðvelt að spila sig í gegnum hana.

„Við reynum að breyta einhverju og prófa eitthvað nýtt. Sjá hvort við getum ekki haldið áfram að pressa eins og við gerðum í byrjun leiks og koma þeim í smá vandræði. En Valsmenn eru bara með ofboðslega marga góða einstaklega í sínu liði sem geta brotið upp leiki. Þegar við lyftum miðjunni okkur í hápressu í upphafi síðari hálfleiks þá náðu þeir hörkuspili í gegnum miðjuna okkar og upp úr því þriðja markið, þá er þetta náttúrulega bara orðið spurning um að minnka skaðann og gefast ekki alveg upp.“

Rúnar var svo spurður hvort styrkja þyrfti liðið og ef búast mætti við einhverjum sviptingum í leikmannahópi liðsins.

„Ég veit það ekki, það er ekkert í kortunum og við erum búnir að vera ánægðir með þennan hóp. Það er ágætis gengi hjá okkur þrátt fyrir að tapa síðustu leikjum gegn efstu liðum deildarinnar. Það sýnir bara muninn, það eru þrjú lið sem eru töluvert betri en flest öll önnur lið í deildinni.“

Hann segir þrjú lið standa öllum ofar í Bestu deildinni, það eru að sjálfsögðu toppliðin; Víkingur, Valur og Breiðablik. KR hefur nú spilað gegn tveimur þeirra og tapað báðum leikjum, næst mæta þeir þriðja liðinu, Breiðablik á Kópavogsvelli.

Sá leikur var færður yfir á sunnudag verslunarmannahelgarinnar vegna Evrópuævintýra Breiðabliks en vanalega hafa engir leikir farið fram á þessum degi.

„Þessir strákar eru bara á samning, eru í vinnu við að spila fótbolta og þeir verða bara að sætta sig við það. Vonandi verður bara hægt að færa leikinn yfir á laugardag, ef að Blikar og KSÍ eru til í það myndum við frekar vilja spila á laugardag. En við erum ánægðir að íslensk lið séu að standa sig vel í Evrópu“ sagði Rúnar að lokum.