Sér­fræð­ing­ar ef­ast um tján­ing­ar­frels­is­vörn Trumps

Þá segja þeir að Trump hafi klárlega vitað að hann væri að dreifa lygum um að kosningasvindl hefði átt sér stað, enda hafi hans helstu ráðgjafar, ráðherrar, dómsmálaráðuneytið og aðrir sagt honum að svo væri.

John Lauro, einn verjenda Trumps, sakaði í gærkvöldi Dómsmálaráðuneyti Bandaríkjanna um að vopnvæða fyrsta ákvæði stjórnarskrár ríkisins sem snýr að tjáningarfrelsi og sagði að Trump hefði reitt sig á ráð þáverandi lögmanna hans. Lauro gaf einnig til kynna að hann myndi reyna að tefja málaferlin, þó Jack Smith, sérstakur rannsakandi ráðuneytisins, hafi sagt að hann vilji að réttarhöldin hefjist sem fyrst.

Trump sækist aftur eftir tilnefningu Repúblikanaflokksins til forsetakosninanna í nóvember á næsta ári og er lang líklegastur til að hljóta hana, miðað við kannanir.

Í færslu sem Trump birti á Truth Social, samfélagsmiðli sínum, í nótt sagði hann að „öfgavinstrið“ væri að reyna að glæpavæða tjáningarfrelsi.

Hann sagði einnig að hann fengi aldrei réttlát réttarhöld í Washington DC, þar sem meirihluti íbúa sé andvígur honum. Í sömu færslu segir hann að borgin smáni Bandaríkin og heiminn allan.

Snýr ekki eingöngu að orðum Trumps

Sérfræðingar sem AP fréttaveitan ræddi við efast um að tjáningarfrelsisvörn Trumps muni duga til og þá sérstaklega vegna þeirra skrefa sem hann og bandamenn hans tóku til að reyna að breyta úrslitum kosninganna.

Í ákærunni sjálfri segir að Trump hafi rétt til þess að tala um kosningarnar og jafnvel til að segja ósatt og halda því fram að hann hafi unnið. Þá hafi hann einnig haft rétt á því að beita löglegum leiðum til að krefjast endurtalninga og rannsókna eftir kosningarnar og það hafi hann gert.

Þar segir að hann hafi þó ekki rétt til að beita ólöglegum leiðum og bellibrögðum til að snúa úrslitunum. Saksóknarar segja einnig að viðleitni Trumps hafi brotið gegn grunni lýðveldis í Bandaríkjunum.

Ákæran snýr ekki eingöngu að lygum hans um úrslit kosninganna heldur einnig tilraunir hans og bandamanna hans til að skipta út réttkjörnum kjörmönnum í sjö ríkjum.

Forsetakosningar í Bandaríkjunum virka á þann veg að kjósendur ríkja kjósa í raun ekki forseta, heldur svokallaða kjörmenn. Þeir eru alltaf 538 talsins og deilast milli ríkja eftir fjölda þingmanna, en sá fjöldi tekur mið af íbúafjölda. Kjörmennirnir eiga svo að velja þá forsetaframbjóðendur sem kjósendurnir völdu.

Í flestum ríkjum fær sá forsetaframbjóðandi sem vinnur þar alla kjörmenn ríkjanna en í nokkrum fá báðir hlutfallslegan fjölda miðað við atkvæði. Eastman og aðrir Trump-liðar reyndu að skipta út kjörmönnum í nokkrum ríkjum svo þeir gætu valið Trump en ekki Biden.

Þrýstu á Pence til að samþykkja ranga kjörmenn

Trump-liðar fengu menn sem voru ekki kjörnir kjörmenn til að fylla út eyðublöð eins og þeir hefðu verið kjörnir og reyndu að fá Mike Pence, varaforseta Trumps, til að samþykkja þá en Pence hafði formlegt hlutverk við staðfestingu úrslita kosninganna.

Ríkin sem um ræðir eru Arisóna, Georgía, Michigan, Nevada, Nýja Mexíkó, Pennsylvanía og Wisconsin.

Pence neitaði en þann 6. janúar 2021 réðust stuðningsmenn Trumps inn í þinghús Bandaríkjanna með því markmiði að koma í veg fyrir staðfestingu úrslitanna. Á meðan árásin átti sér stað, tísti Trump og gagnrýndi Pence harðlega.

Skömmu síðar þurftu lífverðir varaforsetans að flytja hann á brott úr þinghúsinu á meðan stuðningsmenn Trumps inn í húsinu og fyrir utan kölluðu eftir því að Pence yrði hengdur.

Pence tjáði sig við Fox News í gær þar sem hann sagði að Trump og „klikkaðir“ lögmenn hans hefðu ekki verið að biðja hann um neitt annað en að hafna réttmætum atkvæðum Bandaríkjamanna. Margir af þessum lögmönnum eru nefndir í ákærunni og þykir sérfræðingum líklegt að Smith muni einnig ákæra þá á næstunni eða nota mögulegar ákærur gegn þeim til að fá þá til að bera vitni gegn Trump.

Lauro hefur einnig gefið í skyn að vörn Trumps muni snúast um að hann hafi í raun trúað þessum lögmönnum sínum. Í ákærunni eru þó nefnd fjölmörg dæmi þar sem forsetanum var sagt að hann væri að segja ósatt og er þar að auki nefnt að nokkrum dögum fyrir árásina á þinghúsið, sakaði Trump Mike Pence um að vera „of heiðarlegur“.

Það var eftir að Pence neitaði að samþykkja hina röngu kjörmenn og gefur það sterklega til kynna að Trump hafi vitað að hann væri að biðja Pence um að gera eitthvað sem hann vissi að væri ólöglegt.

Sjá einnig: Vissu að það sem þeir báðu Pence um væri ólöglegt

Mætir fyrir dómara í kvöld

Trump mun mæta fyrir dómara klukkan átta í kvöld í Washington DC og verður hann formlega ákærður þar fyrir að reyna að breyta úrslitum kosninganna, sem hann tapaði fyrir Joe Biden.

Öryggisgæsla í Washington hefur verið stóraukin vegna komu Trumps í réttarsalinn en hann hefur aðeins komið einu sinni til Washington frá því hann flutti úr Hvíta Húsinu.

Trump gagnrýnir málareksturinn harðlega og sakar núverandi stjórnvöld um spillingu og hneykslismál. Auk þess að gagnrýna Joe Biden harðlega hefur Trump líka hellt úr skálum reiði sinnar yfir mótherja sína innan Repúblikanaflokksins, eins og Mike Pence fyrrverandi varaforseta og Ron DeSantis ríkisstjóra Flórída.