Hrósar Íslendingum fyrir frábæra 75 ára þjónustu við alþjóðaflugið

Þjónustan hófst í gamla flugturninum á Reykjavíkurflugvelli skömmu eftir síðari heimsstyrjöld en er núna til húsa í flugstjórnarmiðstöðinni, sem heimsótt var í fréttum Stöðvar 2. Þar var þess minnst í dag að 75 ár eru liðin frá því Alþjóðaflugmálastofnunin samdi við Íslendinga árið 1948 um að annast flugumferðarþjónustu á Norður-Atlantshafinu, á svæði sem nær allt til Norðurpólsins.

Í tilefni afmælisins afhjúpuðu þeir Kjartan Briem, framkvæmdastjóri Isavia ANS, dótturfélags Isavia, og Christian Schleifer, fulltrúi Alþjóðaflugmálastofnunarinnar, minnismerki en Austurríkismaðurinn Schleifer bar lof á þjónustu Íslendinga.

„Á þeim 75 árum sem þessi samningur hefur verið í gildi hefur það sannast að þið hafið veitt frábæra þjónustu. Ísland hefur veitt frábæra þjónustu. Isavia hefur veitt frábæra þjónustu,“ sagði Christian Schleifer, en hann er stjórnarformaður Joint Support Committee hjá ICAO, sem annast samninginn við Ísland.

Þannig hafi Íslendingum tekist vel að aðlaga þjónustuna að breyttum þörfum alþjóðaflugsins.

„Frábær vinna, góð aðlögun. Við heimsóttum flugstjórnarmiðstöðina hérna og það sést að þetta fólk stendur við það sem það lofaði. Og við sjáum árangurinn í mjög góðri frammistöðu þessarar stofnunar,“ sagði Christian Schleifer.

Flugumferðarstjórinn Ásgeir Pálsson starfaði í 46 ár í flugleiðsöguþjónustu og stýrði flugstjórnarmiðstöðinni í aldarfjórðung.

„Ég hef oft höfðað til þess að þetta sé minnst þekkti útflutningsatvinnuvegur Íslands. Út af því að þetta er auðvitað borgað af notendagjöldum af þeirri flugumferð sem flýgur hérna yfir,“ sagði Ásgeir, sem er fyrrum framkvæmdastjóri Isavia ANS.

„Þetta gerir mikið fyrir samfélagið okkar. Ég held að veltan hérna sé á milli átta og níu milljarðar á þessu ári í tekjur hjá okkur,“ sagði Kjartan Briem, framkvæmdastjóri Isavia ANS.

„Þetta er auðvitað allt greitt í gjaldeyri og sjötíu prósent af rekstrarkostnaði hérna eru launagreiðslur,“ sagði Ásgeir.

Kjartan segir að um 250 manns starfi í flugstjórnarmiðstöðinni vegna alþjóðaflugsins og áætlar að fimmtíu til eitthundrað störf til viðbótar tengist starfseminni.

„Og fyrirtækið hér og starfsmenn þess eru mjög stoltir af þjónustunni. Og við teljum okkur vera ákveðna leiðtoga í samstarfi ríkjanna sem eru að sjá um flugið í Norður-Atlantshafinu. Að því leyti viljum við viðhalda þeirri stöðu og vera áfram í fararbroddi,“ sagði Kjartan Briem.

Íslenska flugstjórnarsvæðið er með stærri flugstjórnarsvæðum heims en það nær yfir 5,4 milljón ferkílómetra svæði, samkvæmt upplýsingum Isavia. Flugstjórnarsvæðið nær frá Greenwich-lengdarbaugnum í austri og vestur fyrir Grænland, frá Norðurpólnum, suður fyrir Færeyjar og langleiðina til Skotlands. Rétt rúmlega fjórðungur flugumferðar á leið yfir Norður-Atlantshafið fer í gegnum íslenska flugstjórnarsvæðið.

Hér má sjá frétt Stöðvar 2: