Félix má fara til Barcelona fyrir rúma tíu milljarða

Hinn 23 ára gamli framherji er sem stendur á láni hjá Spánarmeisturunum og líkar vel. Hann hefur komið að sex mörkum í átta leikjum og samkvæmt ESPN tengir Félix vel við markamaskínuna Robert Lewandowski.

ESPN segir einnig að Joan Laporta, forseti Barcelona, sé bjartsýnn á að félagið getið keypt Félix þegar lánssamningurinn hefur runnið sitt skeið. Það virðist sem Laporta vonist til að ofurumboðsmaðurinn Jorge Mendes geti aðstoðað Katalóníufélagið þar sem fjárhagsstaða þess er ekki upp á marga fiska þessa dagana.

Félix skrifaði nýverið undir framlengingu á samningi sínum í Madríd og er samningsbundinn til ársins 2029. Það eru því litlar sem engar líkur á að Barcelona fái afslátt og verður áhugavert að sjá hvað félagið þarf að gera til að finna þær 70-80 milljónir evra sem Atlético vill fá fyrir leikmanninn.