Allra leiða leitað til standa með Grind­víkingum

Málefni Grindvíkinga voru nánast eina umræðuefni ríkisstjórnarfundar í morgun. Innviðaráðherra og formaður Framsóknarflokksins sem stýrði fundinum í fjarveru forsætisráðherra segist skynja að allir hefðu áhuga á að koma að lausn mála fyrir Grindvíkinga. Mikilvægt væri að einhver svör kæmu sem fyrst frá fjármálastofnunum varðandi þeirra aðkomu. Húsnæðismálin væru mest aðkallandi.

„Þar höfum við verið með ólíka hópa að störfum. Einn er einfaldlega að skoða það húsnæði sem er til og tilbúið á markaði. Skoða hvernig hið opinbera getur komið að því og notað þau kerfi sem við erum með. Það er umtalsverður fjöldi íbúða og við erum þegar komin með ágætis sýn á hvernig það gæti gerst,“ segir Sigurður Ingi.

Annar hópur væri síðan að skoða þörfina til lengri tíma, meðal annars einhvers konar viðlagasjóðshús eins og reist voru eftir Vestmannaeyjagosið og fleiri leiðir. Huga þyrfti að lóðum fyrir slík hús hér og þar.

„En fyrst og fremst þurfum við að átta okkur á því hvað það er sem Grindvíkingarnir sjálfir vilja og þurfa. Það er auðvitað flókin staða af því náttúran hagar sér eins og hún er að haga sér,“ segir innviðaráðherra. Tryggja þyrfti aðgengi byggðar á Reykjanesi að köldu og heitu vatni og jafnvel byggja varnargarða víðar en í Svartsengi. Ríkissjóður réði við verkefnið.

Þórdís Kolbrún R. Gylfadóttir fjármálaráðherra segist ekki skynja annað en raunsæi, ábyrgð og skilning í þeim viðræðum sem hún hafi átt í við fulltrúa fjármálastofnana undanfarna daga.

„En það þarf líka að hugsa slík mál til enda og vanda til verka. Þannig að það samtal er í gangi og ég bind vonir við að það skýrist á næstu dögum,“ segir fjármálaráðherra. Aðstæður fólks væru margs konar út frá ástandi húseigna og óvissan mikil þar sem náttúruhamfarir stæðu enn yfir og einnig þyrfti að huga að stöðu þeirra sem væru á leigumarkaði.

Nú væri í forgangi að bregðast við stöðu fólks í dag og næstu virkurnar. Það væri hins vegar alveg ljóst að stjórnvöld og vonandi fjármálastofnanir muni sjá til þess að Grindvíkingar geti haldið áfram með líf sitt.

„Og taka tillit til þess að fólkið er í stöðu sem ekkert okkar vill vera í. Er í mikilli óvissu um hvað verður um þeirra, bæði fasteign, tryggingar, virði og svo framvegis. Þar er að hluta til verkefni sem við getum ekki eðli málsins samkvæmt svarað núna. En það sem við getum gert er að hjálpa fólki að komast í gegn um mánaðamót og það geti komið sér fyrir á næstu mánuðum á öðrum svæðum heldur en inni í Grindavík,” segir Þórdís Kolbrún R. Gylfadóttir.