Suárez segir Núnez einn besta fram­herja heims

Núnez hefur skorað í fjórum landsleikjum í röð en aðrir tveir aðrir Úrúgvæar hafa afrekað það. Annar þeirra er Suárez sem talaði mjög fallega um Núnez eftir leikinn í gær.

„Einn besti framherji í heimi er á undan mér í goggunarröðinni,“ sagði Suárez sem kom inn á sem varamaður fyrir Núnez á 73. mínútu. Leikurinn í gær var 137. landsleikur Suárez.

„Við þurfum að styðja hann og njóta hans. Í dag er ég í öðru hlutverki og er ánægður að vera hér og hjálpa hópnum.“

Núnez leikur með Liverpool sem Suárez gerði garðinn frægan með á árunum 2011-14. Suárez var einmitt fenginn til að tala við Núnez eftir að hann fór rólega af stað með Liverpool eftir komuna frá Benfica í fyrra.

Úrúgvæ hefur unnið síðustu þrjá leiki sína í undankeppni HM með markatölunni 7-0. Liðið er í 2. sæti Suður-Ameríkuriðilsins með þrettán stig eftir sex leiki.

Úrúgvæar hafa unnið sex af átta leikjum sem þeir hafa spilað undir stjórn Marcelos Bielsa, gert eitt jafntefli og aðeins tapað einum.