Sara þakkar meiðslunum fyrir að ná að endur­nýja kynnin við vinina

CrossFit aðdáendur eru búnir að bíða lengi eftir endurkomu Söru enda langt síðan við sáum hana meðal þeirra bestu. Meiðsli hafa einkennt feril hennar síðustu ár en í nýju viðtali sá Sara jákvæðu hliðar þess að geta ekki æft og keppt í íþróttinni sinni.

Sara var komin alla leið til Ástralíu í lok síðasta árs þegar hún meiddist á æfingu og ákvað á endanum að hætta við það keppa. Hún hafði ferðast hálfan hnöttinn og ætlaði að stimpla sig aftur inn með góðri frammistöðu á Down Under Championship. Ekkert varð af því og næst á dagskrá er að ná sér góðir fyrir nýtt tímabil.

Sara nýtti ferðina samt vel og kynnti sér helstu náttúruperlur Ástralíu. Hún hefur nú sýnt frá ævintýrum sínum í Ástralíu í myndbandi á Youtube síðu sinni.

Sýnir frá ferðlaginu

Sara sýnir ekki aðeins frá ferðalögum sínum í Youtube þættinum heldur lítur hún líka um öxl. Sara hefur fulla ástæðu til að kvarta og kveina yfir erfiðum síðustu árum en hún vill samt horfa jákvætt á þessa krefjandi tíma.

Sara ræðir nefnilega meiðslatímann í viðtali í þættinum. „Hérna erum við komnar og að byrja endurhæfingu númer 354. Þetta snýst um þolinmæði en við munum komast til baka,“ sagði Sara.

„Ég var að hugsa um það um daginn að ef ég gæfist upp núna, hvað færi ég þá að gera. Þér líður eins og þú hafi klúðrað öllu en þetta er bara hluti af þér sjálfri. Þú skilgreinir bara allt lífið þitt út frá þessu því þú ert svo staðráðin að ná langt í íþróttinni. Þegar þú ert ekki að komast þangað sem þú ætlar þér þá líður þér svolítið eins og þú getir ekki afrekað neitt það sem eftir er,“ sagði Sara hreinskilin.

Hún hefur alla tíð valið brosið og jákvæðnina yfir fýlusvipinn og vonda skapið. Hún breytir því heldur ekki núna.

Lán í óláni

„Meiðsli eru kannski eins og lán í óláni því þú lærir svo mikið af þeim. Þegar ég sleit krossbandið þá áttaði ég mig á því að ég var búin að gleyma öllum vinunum mínum sem og því að hafa eitthvað jafnvægi í mínu lífi,“ sagði Sara.

„Þetta lærði ég af þessum stóru meiðslum mínum að ég endurnýjaði kynnin við alla góðu vinina mína. Þetta voru tvö af bestu árum ævinnar því ég var laus við alla pressu og svoleiðis,“ sagði Sara.

„Svo hugsaði ég að nú yrði ég að reyna að komast til baka. Ég var á mikilli uppleið og þá kom annars skellur,“ sagði Sara niðurlút. Hún ætlar þó ekki að gefast upp og verður vonandi upp á sitt besta þegar The Open byrjar í febrúar.

Það má horfa á allan þáttinn hér fyrir neðan.