„Kannski það eina sem mér fannst ekki gott við við­skilnaðinn“

Freyr tók við stjórnar­taumunum hjá Lyng­by sumarið 2021 og var liðið þá í dönsku B-deildinni. Undir stjórn Ís­lendingsins tryggði Lyng­by sér upp í dönsku úr­vals­deildina og á síðasta tíma­bili bjargaði liðið sæti sínu í deildinni á ævin­týra­legan hátt í loka­um­ferðinni. Af­reki sem var lýst sem krafta­verkinu mikla.

Á yfir­standandi tíma­bili hefur liðinu gengið vel og situr um miðja deild. Leiðir, í því sem virðist vera hið full­komna dæmi um gott sam­starf þjálfara og fé­lags, skilja nú og er Freyr þakk­látur fyrir tíma sinn hjá Lyng­by.

„Ég er mjög stoltur. Ó­trú­lega á­nægður með dvöl mína hjá fé­laginu frá upp­hafi til enda. Þetta hefur verið draumi líkast. Þegar að ég var ráðinn til Lyng­by á sínum tíma voru margir sem ráð­lögðu mér það, áður en ég tók við starfinu, að taka ekki við starfinu. Út af svipuðum á­stæðum og er verið að nefna núna þegar að ég tek við þjálfun Kortrijk. Ekki alveg jafn ýktum en svipuðum.

Ég fór eftir minni sann­færingu og rann­sóknar­vinnu. Ég vissi hvað þyrfti til og það gekk upp. Þetta er bara búið að vera ævin­týri líkast. Sam­starfið með starfs­fólki fé­lagsins, stuðnings­mönnum, leik­mönnum og eig­endum. Ég er búinn að gera það sem ég var beðinn um að gera. Fé­lagið er búið að vaxa, við höfum náð góðum árangri innan sem og utan vallar. 

Þá hef ég vaxið líka. Ég hef fengið það út úr þessu verk­efni sem ég vildi. Ég er bara of­boðs­lega þakk­látur öllum í kringum Lyng­by. Þá er gaman að sjá hvað Lyng­by hefur átt stóran sess hjá Ís­lendingum. Vonandi heldur það á­fram.“

Vista­skipti Freys yfir til Belgíu koma upp á tíma þar sem leik­menn Lyng­by voru í vetrar­fríi. Þar með gafst honum ekki tæki­færi til þess að kveðja leik­menn í eigin per­sónu. Eini leiðin­legi anginn á annars við­skilnaði í sátt og sam­lyndi allra.

„Það er kannski það eina sem mér fannst ekki gott við við­skilnaðinn. Ég gat ekki knúsað leik­mennina, horft í augun á þeim og sagt bless þannig. Því miður. Ég er hins vegar búinn að tala við þá flesta og þeir sýna mér mikinn skilning.

Varðandi stuðnings­mennina þá er planið að ég snúi aftur til Lyng­by við fyrsta tæki­færi og þakki þeim fyrir. Vonandi fæ ég að gera það. Það er planið en verður undir nýja þjálfaranum komið. Ég verð líka að bera virðingu fyrir því.“