Finnur Þór skipaður héraðs­dómari

Þetta segir í tilkynningu á vef Stjórnarráðsins. Átta sóttu  um stöðuna þegar hún var auglýst í september síðastliðnum. Dómnefnd um hæfni umsækjenda mat Finn Þór jafnhæfastan ásamt þeim Sindra M. Stephensen og Stefaníu G. Sæmundsdóttur.

Í tilkynningu segir að Finnur Þór hafi lokið embættisprófi í lögfræði frá Háskóla Íslands árið 2007 og öðlast sama ár réttindi til málflutnings fyrir héraðsdómi. 

Frá 28. september 2023 hafi Finnur Þór verið settur dómari við Héraðsdóm Reykjavíkur en þar áður hafi hann meðal annars starfað sem saksóknarfulltrúi og aðstoðarsaksóknari hjá embætti sérstaks saksóknara, síðar héraðssaksóknara, þar af sem skipaður saksóknari frá árinu 2016. 

Þá hafi Finnur Þór starfað sem lögfræðingur hjá embætti umboðsmanns Alþingis og sem starfsmaður rannsóknarnefndar Alþingis um aðdraganda og fall íslensku bankanna árið 2008. Þá hafi hann verið starfsmaður og meðritstjóri skýrslu rannsóknarnefndar Alþingis um þátttöku Hauck & Aufhäuser Privatbank KGaA árið 2003 í kaupum á eignarhlut ríkisins í Búnaðarbanka Íslands. Finnur Þór hafi einnig sinnt kennslu í lögfræði á háskólastigi.