Skoða að sækja bætur fyrir neyt­endur vegna sam­ráðsins

Meint samráð átti sér stað á árunum 2008 til 2013 og fólst meðal annars í sér að fyrirtækin skiptust á viðkvæmum upplýsingum og hækkuðu verð gagnvart viðskiptavinum til muna, án þess að eiga í hættu á að missa þá úr viðskiptum.

Reyndu að hafa áhrif á rannsóknina

Þá eru forsvarsmenn fyrirtækjanna sagðir hafa reynt að spilla fyrir rannsókn Samkeppniseftirlitsins með því að segja ósatt í skýrslutökum, til dæmis þegar þáverandi forstjóri Eimskips, Gylfi Sigfússon, lýsti hatri sínu á þáverandi forstjóra Samskipa, Ásbirni Gíslasyni, þrátt fyrir að þeir hafi verið saman í vinahóp og farið nokkrum sinnum saman í golf- og veiðiferðir á umræddu tímabili. Eimskip var sektað um 1,5 milljarð og Samskip um 4,2 milljarða vegna brotanna.

Milljarðarnir sextíu og tveir sem félögin eru talin hafa valdið í samfélagslegu tjóni skiptast svona niður. 26 milljarðar í hækkandi verði á innfluttri vöru til neytenda, sautján milljarðar í auknum útgjöldum lántaka verðtryggðra lána og þrettán milljarðar í auknum gjöldum á útflytjendur. Sex milljarðar voru í kostnaðarauka viðskiptavina í landflutningum og flutningsmiðlun.

Ótrúlegar tölur

Formaður Neytendasamtakanna segist vart trúa þessum tölum, svo stórar eru þær.

„Þetta hefur ótrúlega víðtæk áhrif í samfélaginu, bæði bein áhrif og óbein áhrif. Þessar upphæðir, 62 milljarðar, þetta er bara óheyrt,“ segir Breki. 

Hann segir samtökin vera farin að skoða hvort hægt sé að sækja bætur fyrir neytendur. Til er fordæmi um það frá því í samráðsmáli olíufélaganna frá árinu 2004.

„Við ætlum að setjast yfir þessa skýrslu og skoða hana með okkar lögfræðingum. Taka svo ákvörðun um hvernig við ætlum að halda málinu áfram. Málið er ekki búið, það mun halda áfram,“ segir Breki. 

Spyr hvernig fyrirtækin ætli að bæta tjónið

Hann vill sjá breytingar.

„Mig langar að beina þeirri spurningu til stjórnenda þessara fyrirtækja, hvernig ætlið þið að bæta tjón samfélagsins sem þið hafið valdið? Og ég vil beina því einnig til stjórnvalda, hvað ætlið þið að gera til að koma í veg fyrir að svona endurtaki sig?“ segir Breki.