At­kvæða­greiðsla VR um röð verk­falla á Kefla­víkur­flug­velli hafin

Landsamband verslunarmanna og VR, fjölmennasta verkalýðsfélag landsins, voru ekki aðilar að kjarasamningum breiðfylkingarinnar og Samtaka atvinnulífsins sem undirritaðir voru á fimmtudag. Ragnar Þór Ingólfsson formaður VR viðurkennir að þeir samningar verði nokkuð ráðandi varðandi launaliðinn í þeim viðræðum sem hófust í morgun við Samtök atvinnulífsins.

Hins vegar hefur VR boðað röð verkfalla um 180 starfsmanna félagsins hjá Icelandair á Keflavíkurflugvelli vegna vaktafyrirkomulags í sérkjarasamningi við flugfélagið. Atkvæðagreiðsla um verkfallsboðun hófst í morgun og lýkur á fimmtudag.

Ragnar Þór segir  að fyrstu aðgerðirnar hæfust á miðbætti á föstudag í næstu viku og stæðu í tvo sólarhringa.

„Það er hægt að afstýra verfallsaðgerðum hvenær sem er. Það er auðvitað algerlega undir okkar viðsemjendum komið hvort það verður raunin ef vel gengur. En við þurfum auðvitað að vinna hratt og vel. Svo sjáum við hvort samningsvilji sé til staðar hjá okkar viðsemjendum, hvernig vinnan gengur,“ sagði Ragnar Þór fyrir samninganefndarfund í morgun.

Deilan snýst um dagvinnuvaktir starfsfólks í innritun farþega og hleðslu flugvéla yfir vetrarmánuðina, sem standa frá fimm að morgni til fimm síðdegis en eru rofnar launalaust í fjóra tíma frá níu til eitt.

Sigríður Margrét Oddsdóttir framkvæmdastjóri Samtaka atvinnulífsins segir Félagsdóm réttan farveg fyrir gildandi sérkjarasamninga telji VR brotið á starfsmönnum.

„Þetta er kjarasamningur sem er í gildi og hefur verið í gildi upp á Keflavíkurflugvelli. Ef menn eru ósáttir við framkvæmd hans er auðvitað rétta leiðin að stefna fyrir Félagsdóm."

Þannig að þið teljið ekki að hægt sé að leysa þetta í þessum viðræðum?

„Við erum auðvitað hér til að fara í gegnum kjaraviðræður og munum gera það,“ segir Sigríður Margrét.

Burt séð frá þessu máli þurfa verslunarmenn og Samtök atvinnulífsins að ná saman um aðalkjarasamning til næstu fjögurra ára. Sigríður Margrét segir samninginn við breiðfylkinguna í síðustu viku leggja línurnar í stórum dráttum.

„VR tók auðvitað þátt í að móta þessa stefnu og var með okkur og breiðfylkingunni í viðræðunum um nokkurra mánaða tímabil. Þannig að þau eiga líka hlut í þessum samningum,“ segir framkvæmdastjóri SA.

Ragnar Þór segir að um margt þurfi að ræða.

„Við erum auðvitað með fjölmörg mál inni í okkar kjarasamningi sem þarf að fara í og afgreiða. Ekki bara launaliðinn og forsenduákvæði heldur fjölmörg önnur mál. Kjarasamningar eru í eðli sínu ólíkir á milli stéttarfélaga og starfsgreina. Þannig að þetta gæti alveg tekið smá tíma," segir Ragnar Þór Ingólfsson.

Verði að öllum verkfallsaðgerðum VR verða þær með þessum hætti:

Frá kl. 00:01 föstudaginn 22. mars 2024 til kl. 23:59 sunnudaginn 24. mars 2024.

Frá kl. 00:01 miðvikudaginn 27. mars 2024 til kl. 23:59 fimmtudaginn 28. mars 2024.

Frá kl. 00:01 sunnudaginn 31. mars 2024 til kl. kl. 23:59 þriðjudaginn 2. apríl 2024.

Frá kl. 00:01 föstudaginn 5. apríl 2024 til kl. 23:59 þriðjudaginn 9. apríl 2024.

Ótímabundin vinnustöðvun frá kl. 00:01 föstudaginn 12. apríl 2024.