Ríkis­sátta­semjari reynir til þrautar að miðla málum

„Við erum alltaf að þokast ef við erum að tala saman. Ef það er verið að kasta á milli hugmyndum er alltaf einhver von á að við náum lendingu á endanum. Það er bara jákvætt. Við höfum þrátt fyrir þetta útspil SA í dag, sem setti náttúrulega allt upp í bál og brand ef svo má segja, verið að ná lendingu í öðrum málum,“ segir Ragnar Þór Ingólfsson formaður VR í samtali við fréttastofu rétt fyrir klukkan sjö.

Sérstök staða að vera í

„Það er samtal í gangi. Það er verið að kasta hugmyndum á milli og svo lengi sem það er, er alltaf von.“

Samtök atvinnulífsins tilkynntu í dag að stjórn samtakanna hefði samþykkt einróma að boða til allsherjaratkvæðagreiðslu um verkbann á skrifstofufólk innan VR. Tilefnið er yfirvofandi verkfall starfsfólks á Keflavíkurflugvelli. Í kjölfar þessa sagði Ragnar Þór viðbrögð SA ofsafengin og kröfur VR raunhæfar. 

„Þetta er mjög sérstök staða að vera í. Þetta er í fyrsta sinn sem ég fer í gegnum samninga þar sem búið er að hvetja til atkvæðagreiðslu um verkbann, sem er mjög sérstök staða og ætti að vera öllum stéttarfélögum og verkalýðshreyfingunni allri mikið umhugsunarefni. Við höfum verið að nýta daginn til að bregðast við þessu með margvíslegum hætti. Þó ég geti ekki farið ofan í saumana á því núna kemur það vonandi í ljós næstu daga ef ekki semst,“ segir Ragnar. 

Hnútur sem þarf að leysa

Rúm vika er í boðaðar aðgerðir af beggja hálfu en þung stemning var í Karphúsinu í dag. Ragnar segir markmið beggja samningsaðila að klára dæmið sem fyrst.

„Það þarf auðvitað að leysa ákveðinn hnút sem snýr að starfsfólkinu uppi á Keflavíkurflugvelli til þess að þetta komist á það skrið að hægt sé að klára þetta. Þarna stendur hnífurinn í kúnni. Nú er ég nánast dottinn í fjölmiðlabann þannig að þetta er síðasta viðtalið sem ég tek í bili,“ segir Ragnar en viðtalið, sem var tekið rétt fyrir klukkan sjö í kvöld, var það síðasta sem Ragnar Þór veitti áður en Ástráður Haraldsson ríkissáttasemjari setti samninganefndirnar í fjölmiðlabann.

„Við munum að sjálfsögðu gera okkar allra besta til að leysa þetta með það að markmiði að ná ásættanlegri niðurstöðu fyrir okkar félagsfólk uppi á Keflavíkurflugvelli, sem við erum auðvitað í umboði fyrir sem stéttarfélagið þeirra. Það er auðvitað undir þeim komið hvað þau eru tilbúin að sætta sig við, ekki hvað ég er tilbúinn að gera.“

Sérfræðingar VR þurfi nú að rýna hugmyndir SA áður en málið er borið undir félagsmenn VR á flugvellinum. 

Í fyrri útgáfu fréttarinnar sagði að tillagan, sem lögð var fram um kvöldmatarleytið, væri til komin frá Samtökum atvinnulífsins. Það hefur verið leiðrétt.