Halla Hrund býður sig fram

Halla Hrund tilkynnti framboðið formlega með myndskeiði á samfélagsmiðlum. Í samtali við Vísi segir hún að ákvörðunin hafi verið tekin, í góðu samráði við fjölskyldu hennar, yfir páskana.

Hún hafi ákveðið að skella sér í sveitina austur á Síðu í Vestur-Skaftafellssýslu, þar sem hún varði öllum sumrum hjá ömmu sinni og afa, til þess að íhuga framboð. Hún muni einmitt halda fyrsta framboðsfundinn á Kirkjubæjarklaustri klukkan 14 í dag. 

„Ég býð mig fram til forseta Íslands sem fulltrúi almennings, fulltrúi fólksins í landinu. Ég ólst upp í blokk í Árbænum og varði öllum skólafríum í sveitinni austur á Síðu hjá ömmu og afa. Ég ólst upp við þau gildi að mikilvægt væri að leggja sig fram, trúa á það góða í fólki og að allt væri hægt. Í embætti forseta Íslands vil ég halda þessum gildum á lofti og leggja áherslu á samstöðu okkar sem þjóðar, náttúru okkar, menningu og hugvit - fyrir framtíðina,“ segir Halla Hrund.

Markmiðið að gera sem mest gagn

Halla Hrund segir viðeigandi að halda framboðsfund á Kirkjubæjarklaustri, enda hafi mest áberandi áskorunin sem hún hefur fengið komið þaðan. Nánar tiltekið frá gangnamönnum á Austur-Síðuafrétti, sem skoruðu á Höllu Hrund með því að kaupa auglýsingu í Ríkisútvarpinu í lok mars.

„Ég hef fengið áskoranir frá því í haust, sem hafa komið í bylgjum og ágerst. Eins og ég sagði þegar þetta kom fram, þá ákvað ég að fara austur í sveitina yfir páskana og ég tók ákvörðunina þar. Þetta er stór ákvörðun fyrir fjölskyldu og annað. En markmiðið er auðvitað að vinna fyrir samfélagið, gera sem mest gagn. Það er það sem ég er að horfa á, ég vil virkja alla til að taka þátt í samfélaginu. Fólk um allt land, þannig að við getum skapað fleiri tækifæri, bæði hér heima og erlendis. Ég tel að það sé hægt að nýta forsetaembættið með mjög mikilvægum hætti til slíkra góðra verka.“

Fjölskyldan stendur þétt við bakið á Höllu

Sem áður segir tók Halla Hrund ákvörðunina í góðu samráði við fjölskyldu sína. Hún er gift Kristjáni Frey Kristjánssyni, stofnanda og forstjóra 50 skills. Þau eiga tvær dætur, Hildi Kristínu, 11 ára, og Sögu Friðgerði, 4 ára. Foreldrar hennar eru Jóhanna Steingrímsdóttir, hjúkrunarfræðingur og EMDR meðferðaraðili, og Logi Ragnarsson, tölvunarfræðingur. Halla Hrund á einn yngri bróður, Hauk Stein Logason, yfirframleiðanda hjá CCP.

„Þetta er auðvitað fjölskylduákvörðun og fjölskyldan stendur þétt við bakið á mér í þessu verkefni. Hvati minn í þessu framboði er að ég kem úr Hraunbænum, ég ólst þar upp til fjórtán ára aldurs þegar við fluttum í Selásinn, og ég var alltaf í sveit fyrir austan hjá ömmu og afa, ég hef uppskorið ótrúleg tækifæri. Ég bý í þessu fallega, fjölbreytta landi sem hefur gefið manni svo sannarlega margt. Hvati minn er ekki síst að passa upp á að stelpurnar mínar, sem eru að verða tólf og fimm ára, fái að njóta og eiga landið okkar að með sama hætti þegar þær vaxa úr grasi. Tíminn til þess að láta til okkar taka, til þess að tryggja það og vinna að því, hann er akkúrat núna.“

Hafi kynnst fegurð lýðræðisins ung

Aðspurð hvernig næstu mánuðir í harðri kosningabaráttu leggist í hana segir Halla Hrund það fegurð lýðræðisins að margir frambærilegir frambjóðendur hafi gefið kost á sér. Hún beri mikla virðingu fyrir lýðræðinu.

„Afi var hreppsstjóri þegar ég er að vaxa úr grasi. Það þýddi að fólk var mikið að koma á bæinn að kjósa utan kjörfundar. Þannig að maður upplifði svo sterkt þegar voru kosningar hversu mikilvægt það var að eiga þennan rétt á að velja hvaða leið fólk vill að samfélagið fari hverju sinni. Líkt og ég vil byggja á gildum þátttöku og samvinnu heilt yfir, þá finnst mér frábært að sjá ólíka aðila í framboði. Og það er líka mikilvægt að allir taki þátt í kosningunum. Af því að þær eru grunnurinn að því lýðræðissamfélagi sem við eigum. Sem er sannarlega ekki sjálfgefið að eiga.“

Forsetinn eigi ekki að vera flokkspólitískur

Halla Hrund segir að forseti Íslands eigi ekki að vera flokkspólitískur og yfir dægurþras hafinn. Hann sé sameiningartákn og verði að geta sett nefið í vindinn þegar á móti blæs og tekið ákvarðanir sem geta verið óvinsælar.

„Hann hefur sterka rödd til þess að nýta til góðs fyrir samfélagið. Hann á bera að virðingu fyrir þingræðinu og fara varlega með valdheimildir og einungis nýta þær ef afar sérstakar aðstæður skapast í samfélaginu.“

Muni nálgast kosningar af auðmýkt og embættið sömuleiðis

Halla Hrund segir að hún muni nálgast kosningarnar í sumar af auðmýkt og að hún hvetji alla til þess að nýta kosningaréttinn. Nái hún kjöri muni hún nálgast embætti með sama hætti og verða forseti allra Íslendinga.

„Ég hlakka til að hitta fólk um allt land á næstu vikum og heyra hverju við eigum að vinna saman að, fyrir framtíðina,“ segir Halla Hrund að lokum.

Hefur komið víða við í námi og starfi

Halla Hrund er með BA-gráðu í stjórnmálafræði frá Háskóla Íslands, meistaragráðu í alþjóðasamvinnu með áherslu á hagfræði og orkumál frá The Fletcher School við Tufts háskóla, og meistaragráðu í opinberri stjórnsýslu frá Harvard háskóla með áherslu á umhverfis- og orkumál.

Halla Hrund var skipuð orkumálastjóri árið 2021, fyrst kvenna. Hún starfar jafnframt sem aðjúnkt við Harvard þar sem hún kennir á meistarastigi. Frá árinu 2017 hafði hún starfað sem meðstofnandi og framkvæmdastjóri við miðstöð Norðurslóða, Arctic Initiative, við Harvard háskóla. Árið 2019 var Halla Hrund valin Young Global Leader og kom Halla Hrund að kortlagningu breytingaþátta Norðurslóða á vettvangi World Economic Forum. Frá árinu 2015-2021 stofnaði Halla Hrund og starfrækti Arctic Innovation Lab og var leiðbeinandi í ýmsum orkutengdum nýsköpunarhröðlum.

Samhliða stofnun Arctic Initiative vann Halla Hrund að stofnun alþjóðlega jafnréttisverkefnisins Stelpur styðja stelpur (e. Project Girls for Girls). Þar tóku konur frá átta ríkjum úr ólíkum heimsálfum sig saman og byggðu upp verkefni sem miðar að því að efla færni og styrkja tengsl ungra kvenna. Verkefnið er í dag með starfsemi í tugum ríkja.