Sko, einfalda svarið er já!
En það sem fólk þarf að gera til lagfæringar er kannski ekkert svo einfalt fyrir öll. Sumum mun finnast það ekkert vandamál á meðan aðrir myndu frekar kjósa lélegt kynlíf alla ævi heldur en að gera það sem þarf að gera.
Það sem þarf að gera er einfaldlega smá sjálfsskoðun og að vera opinská/r/tt og hreinskilin/n/ð við aðilann sem þú stundar kynlíf með, sama hvort hjásvæfan sé maki til 20 ára eða bara einhver sem þú ert með í eina góða kvöldstund.
Sjálfsskoðunin felst í því að skoða hvað það er sem hver og einn vill úr kynlífinu, og það getur svo sannarlega verið mismunandi á milli fólks. Mundu bara alltaf að þú þarft ekki að fylgja því sem einhverjir aðrir gera. Þarna vantar oft fræðslu um líkamann, hvernig kynlöngun, kynsvörun og kynfærin hreinlega virka til að skilja betur hvernig kynlíf fólk leitar að.
Þá er líka gott að pæla í einu: Ef þú mættir ráða alfarið hvernig kynlífið sem þú stundaðir væri, burtséð frá óskum eða skoðunum hjásvæfu, hvernig væri það?
Þá kemur að opinskáu og hreinskilnu samskiptunum, sem sum forðast eins og heitan eldinn. Er eitthvað af því sem þú komst að í sjálfsskoðun þinni um draumakynlífið þitt eitthvað sem þú getur hugsað þér að ræða við hjásvæfu um að prófa?
Svo gæti jafnvel komið í ljós að það væri eitthvað sem þið getið fundið sameiginlegan grundvöll á og prófað í framhaldi. Hjásvæfan hefurkannski líka einhverjar hugmyndir!
Það skemmtilega við kynlíf með öðru fólki er að hægt er að prófa alls konar saman án þess að því þurfi að fylgja einhverjar kvaðir um áframhaldandi loforð - t.a.m. að gera héðan í frá alltaf svona. Fólk má hugsa um kynlíf eins og hálfgerðan smakkmatseðil, þar sem hægt er að prófa alls konar og svo ákveðið hvað af því fólk vill halda áfram að þróa og hverju það vill sleppa.
Matseðilinn með öllu smakkinu kemur þó ekki að sjálfu sér, heldur verður fólk að ræða það sín á milli! Það er ekki góð hugmynd að koma fólki á óvart með að prófa eitthvað án þess að ræða það og ætla svo bara sjá til hvort partnerinn fílaði það eftir á - þá er ekki um samþykki að ræða!
Til að fá hugmyndir fyrir smakkseðilinn erum við nú það heppin að lifa á tímum þar sem leitarvélar eru orðnar mjög öflugar og ættu alveg að geta gefið ykkur margar (mis)góðar hugmyndir!
Skemmtið ykkur vel!
Ert þú með spurningu til Indíönu? Sendu henni hér:
