Fótbolti

Býst við að Svein­dís Jane sé klár fyrir leikina mikil­vægu

Runólfur Trausti Þórhallsson skrifar
Þorsteinn Halldórsson vonast eflaust til að geta verið örlítið sumarlegri þegar Ísland tekur á móti Austurríki í júní.
Þorsteinn Halldórsson vonast eflaust til að geta verið örlítið sumarlegri þegar Ísland tekur á móti Austurríki í júní. Vísir/Hulda Margrét

Þorsteinn Halldórsson, þjálfari A-landsliðs kvenna í knattspyrnu, býst við að Sveindís Jane Jónsdóttir sé klár í slaginn fyrir leikina mikilvægu gegn Austurríki í undankeppni EM 2025.

Sveindís Jane fór meidd af velli í lokaumferð þýsku efstu deildar kvenna þegar Wolfsburg lagði Essen 6-0. Sveindís Jane var í byrjunarliði Wolfsburg og var nálægt því að skora áður en hún fór meidd af velli um miðbik fyrri hálfleiks.

Sophie Winkler, markvörður Essen, hafði skömmu áður komið askvaðandi úr marki sínu og endaði með að tækla Sveindísi Jane illa. Winkler fékk að líta rauða spjaldið og Sveindís Jane fór meidd af velli.

Þorsteinn var spurður um þetta í dag af Fótbolti.net en hann sagðist ekki reikna með öðru en þessi öflugi leikmaður væri klár í slaginn.

„Hún fékk skurð á hnéð og þurfti að fara út af,“ sagði Þorsteinn meðal annars í viðtali við Fótbolti.net. Þá tók hann fram að Karólína Lea Vilhjálmsdóttir hefði aðeins spilað fyrri hálfleik í 2-3 tapi Bayer Leverkusen gegn Werder Bremen vegna veikinda.

A-landslið kvenna kemur saman um næst helgi. Liðið ferðast svo til Austurríki og spilar við heimakonur þann 31. mái áður en þjóðirnar mætast á Laugardalsvelli þann 4. júní. Um er að ræða gríðarlega mikilvæga leiki í undankeppninni báðar þjóðir eru með þrjú stig að loknum tveimur leikjum.




Fleiri fréttir

Sjá meira


×