Huldu­maður bað um skóflu, lím­band, hanska og kú­bein

Í gæsluvarðhaldsúrskurði Héraðsdóms Reykjavíkur, sem Landsréttur hefur staðfest, koma fram upplýsingar um samskipti í gegnum samfélagsmiðillinn Signal og símtöl sem talin eru tengjast málinu.

Stóra kókaínmálið varðar innflutning á rúmlega 99 kílóum af kókaíni frá Brasilíu árið 2022. Efnin voru falin í timbursendingu en uppgötvuðust áður en þau komu til landsins og því var þeim skipt út fyrir gerviefni. Fjórir menn voru dæmdir í málinu í fyrra en lögreglan taldi ljóst að fimmti maðurinn væri viðriðinn málið og grunar henni að Pétur Jökull sé sá maður.

Samskipti eins sakborninga stóra kókaínmálsins, sem nú hefur hlotið dóm, við þrjá aðganga eru rakin í úrskurðinum. Sakborningurinn segist telja sama manninn á bak við alla þrjá aðgangana, en lögregla telur umræddan mann vera Pétur Jökul.

Skófla, töskur og kúbein

Í samskiptum við einn þessara Signal-aðganga ræddi áðurnefndur sakborningur um leiguhúsnæði þar sem hann átti eftir að losa kókaínið úr timbrinu. 

Huldumaðurinn hafi beðið sakborninginn um að kaupa skóflu, töskur, límband, einnota hanska og kúbein. 

Ekki kemur fram í úrskurðinum hver tilgangurinn hafi verið með þessum munum, eða þá hvort lögreglan viti yfir höfuð hver hann hafi verið.

Einnig er fjallað um samskipti sakborningsins við annan Signal-aðganginn, en fjallað hefur verið nánar um þau áður en lesa má um þau hér.

Sakborningurinn og sá sem fór fyrir aðganginum, huldumaðurinn, hittust í nokkur skipti í miðbæ Reykjavíkur. Lögreglan leitaði í myndbandsupptökum úr öryggismyndavélum á svæðinu og sáu hvar sakborningurinn hitti huldumanninn. 

Ekki sást í andlit huldumannsins en engu að síður renndi þetta stoðum undir að um væri að ræða Pétur Jökul.

Fór út sama dag og Pétur Jökull

Notandi þriðji aðgangsins hringdi í sakborninginn þegar hann var að taka kókaínið úr timbrinu, daginn sem sá síðarnefndi var handtekinn. Þá reyndi hann að hringja í hann nokkrum sinnum þann dag. Lögreglan segir símagögn benda til þess að notandi þessa þriðja aðgangs og Pétur Jökull hafi farið út fyrir landsteinana á sama degi.

Líkt og áður segir vill sakborningurinn meina að sami maður sé á bak við aðgangana þrjá. Og lögreglan telur þann mann vera Pétur Jökul.

Þar að auki er lítillega rætt um símtöl sakborningsins við ótilgreindan einstakling í úrskurðinum, en lítið kemur fram um þau nema að þau hafi farið fram á íslensku.

Pétur Jökull var eftirlýstur af Interpol í byrjun árs en kom sjálfviljugur til landsins í lok febrúar og var í kjölfarið handtekinn og úrskurðaður í gæsluvarðhald.