Leitin hefur enn ekki borið árangur

Þetta kemur fram í tilkynningu frá Lögreglunni á Norðurlandi eystra.

„Mikill fjöldi leitarmanna hefur verið að störfum við Fnjóská frá því tilkynnt var að maður hefði fallið í ána og týnst. Því miður hefur þessi umfangsmikla leit ekki enn borið árangur. Leit verður haldið áfram inn í nóttina og nú er verið að skipuleggja frekari leitaraðgerðir með morgninum,“ segir í tilkynningunni.

Fyrr í kvöld var greint frá því að hinn týndi væri karlmaður um tvítugt. Hann hefði fallið í Fnjóská nokkru ofan við ósa hennar, skammt frá Pálsgerði. Hann var með þremur félögum sínum og hvarf hann þeim sjónum í ánni.

Lögreglu var tilkynnt um fallið í ána klukkan hálf sjö í kvöld.

Fram hefur komið að aðstæður á vettvangi séu erfiðar þar sem að Fnjóská sé nokkuð lituð á þessum slóðum. „En einnig vegna þess að í ósum hennar kvíslast hún mikið þannig að leitarsvæði er víðfeðmt og sums staðar er vatnið það grunnt að erfitt er að koma við tækjum við leitina.“