Mót­mælendur höfða mál á hendur ríkinu

 Til átaka kom á mótmælum fyrir utan ríkisstjórnarfund sem haldinn var í Skuggasundi um morguninn 31. og voru mótmælendur beittir piparúða ásamt því að mörgum var hrint í jörðina. Um tíu mótmælendur voru illa haldnir eftir mótmælin og lögreglumaður slasaðist þegar ráðherrabíl var ekið á hann.

„Það voru mótmæli og fólk fylgdi ekki fyrirmælum lögreglu. Þannig við þurftum að beita piparúða,“ var haft eftir Kristjáni Helga Þráinssyni aðstoðaryfirlögregluþjóni í frétt Vísis um málið. Hann gat ekki farið nánar út í það hvernig fólk fylgdi ekki fyrirmælum.

Reiði og sjokk

Daníel sjálfur varð fyrir piparúða lögreglunnar og hlaut mikil eymsli í augunum af. Hann segist upplifa ummæli stjórnvalda um atburðarrás þessa morguns sem eins konar gaslýsingu. Hann segir að aðgerðir lögreglu hafi verið málaðar upp af stjórnvöldum sem eðlilegar og hóflegar þrátt fyrir að hans eigin upplifanir hafi verið allt annars eðlis.

„Þetta eru embættismenn og ráðherra sem er að lýsa þessu svona. Það fylgir því vald og ábyrgð,“ segir hann.

Daníel segir mótmælendur enn finna til meins vegna átakanna og komu margir lemstraðir og marðir heim. Hópur mótmælenda sem urðu fyrir valdbeitingu lögreglunnar hittist og bar saman sögur sínar. Þau tóku ákvörðun um að leita réttar síns og segir Daníel það mikilvægt svo að slíkt endurtaki sig ekki aftur.

„Það er reiði en það er líka sjokk. Það er besta orðið yfir það, sjokk. Ég veit ekki hvernig ég á að lýsa því. Það að stjórnvöld séu að beita sér með þessum hætti gerir þetta þyngra og það sem ég finn er að fólk ætlar ekki að láta þagga niður í sér. Fólk ætlar að halda áfram að mæta og segja sína skoðun,“ segir Daníel í samtali við fréttastofu.

Tilraun til þöggunar

Hópurinn telur átta manns sem komu illa úr áflogi lögreglunnar og fór á fund lögfræðins til að undirbúa málsókn á hendur lögreglunnar. Daníel segir hópinn enn eiga í erfiðleikum með að átta sig á því sem gerðist. Hann segir mótmælendur hafa nýtt tjáningarétt sinn og að ofbeldistilburði lögreglunnar megi túlka sem þöggun.

„Fólk er að nýta stjórnarskrárvarða rétt sinn til að tjá sína skoðun. Þau eru að koma saman og mótmæla og það eru réttindi almennra borgara. Þegar lögreglan beitir sér gegn almennum borgurum má túlka það sem tilraun til þöggunar. Ég sé það ekki öðruvísi,“ segir Daníel.

Daníel segir jafnframt að það sé annað sem sótti á þau en hefndarlosti við ákvörðunina. Réttlætið komi fyrst og fremst með að felast í því að skýrar skorður séu settar á rými lögregluþjóna til valdbeitingar og að tryggður sé réttur Íslendinga til að mótmæla frjálst og án ótta við geðþóttaákvarðanir stjórnvalda og þeirra fulltrúa.

„Ég held að við öll sem erum að leita réttar okkar í þessu erum sammála um það að þetta snúist ekkert um okkur heldur snýst þetta um það að það verði lögð lína og þetta verði skoðað. Svo þetta verði ekki eitthvað sem endurtekur sig aftur. Að það verði ekki til þess að þau sem eftir okkur koma, að þau geti nýtt rétt sinn líka,“ segir Daníel.

„Ef maður lætur þetta kjurrt liggja er hætta á því að þetta verði eðlilegra og eðlilegra. Lögreglan þarf aðhald eins og allt annað í stjórnkerfið. Maður á að halda lögreglunni að hærri standard en þetta,“ bætir hann við.