„Fylgir því því­lík sæla að koma hingað aftur“

Þau Margrét Brynjólfs­dóttir, Gísli Jóns­son, Ed­vard Júlíus­son og Sveinn Ísaks­son nutu þess að spila í blíð­skapar­veðri á Húsa­tófta­velli í dag þegar að okkur bar að garði og voru himin­lifandi með að geta leikið aftur golf á sínum velli því gengið hefur á ýmsu undan­farna mánuði.

„Það er góð til­finning sem fylgir því að snúa hingað aftur á Húsa­tófta­völl og leika golf á nýjan leik. Það er ekki hægt að segja annað,“ segir Gísli Jóns­son. Völlurinn er í topp­standi.“

Margrét tók undir orð Gísla en þau eru Grind­víkingar og hafa verið annað slagið í bænum.

„Þetta hefur allt saman verið í lausu lofti. En þetta fer að lagast.“

Með þeim í för á Húsa­tófta­velli þennan dag var Ed­vard Júlíus­son sem er hvorki meira né minna en einn af stofn­með­limum Golf­klúbbs Grinda­víkur. Hann líkt og aðrir er ó­trú­lega á­nægður með að geta spilað aftur golf á vellinum.

„Það er ekki hægt að segja neitt annað. Það fylgir því því­lík sæla að koma hingað aftur. Taka upp sömu gripin og maður hefur haft árum saman.“

Þú hefur engu gleymt?

„Nei engu gleymt,“ svaraði Edvard. „ Engu gleymt. Blessaður vertu við erum enn að ná fuglum og pari. Allt það sem þarf að vinna í þessu.

Kylfingar sem leika golf á Húsa­tófta­velli þurfa að fara eftir á­kveðnum reglum sem gilda á svæðinu sökum jarð­hræringanna á Reykja­nes­skaga. Fjór­menningarnar upp­lifa sig full­kom­lega örugga á svæðinu.

„Þetta eru sömu gömlu sprungurnar og hafa alltaf verið hér. Það er engin hætta á því að maður fari ofan í þær,“ svaraði Gísli og Ed­vard endur­ómaði hans orð: „Við þekkjum þetta alveg.“