Hefur aldrei verið í vinnu en hefur verið iðinn við af­brot

Þetta er meðal þess sem kemur fram í dómi Héraðsdóms Reykjaness, sem kveðinn var upp í morgun. Með dóminum var Kourani dæmdur til átta ára fangelsisvistar en dómurinn var hegningarauki við annan dóm, sem hann hlaut aðeins örfáum dögum eftir að hafa framið hnífstunguárás í OK Market.

Í kafla dómsins um ákvörðun refsingar segir að Kourani hafi samkvæmt sakavottorði verið dæmdur í þrjátíu daga fangelsi fyrir skjalafals þann 19. desember árið 2017. Hann hafi komið hingað til lands í upphafi sama árs.

Líkamsárás, sprengjuhótanir, vopnalagabrot og margt fleira

Þá hafi hann í Landsrétti þann 31. mars 2023 verið dæmdur í tólf mánaða fangelsi fyrir líkamsárás, húsbrot, brot gegn nálgunarbanni, eignaspjöll, fimm brot gegn valdstjórninni, tvær sprengjuhótanir, skjalafals, vopnalagabrot, umferðarlagabrot og sjö brot gegn sóttvarnarlögum. 

Hann hafi lokið tólf mánaða afplánun þess dóms þann 26. janúar 2024. Eftir það hafi hann þann 14. mars síðastliðinn verið dæmdur í fjórtán mánaða fangelsi fyrir líkamsárás, valdstjórnarbrot, sprengjuhótun, tilraun til sprengjuhótunar og umferðarlagabrot. Sá dómur sæti áfrýjun fyrir Landsrétti.

Hafi upplifað hrylling og djöfulskap

Í dóminum segir að fyrir dóm hafi komið geðlæknir og dómkvaddur matsmaður sem hafi staðfest fyrir dómi matsgerð. Hann hafi kveðið engan vafa leika á því að Kourani væri sakhæfur í skilningi almennra hegningarlaga. Meira álitamál væri hvort ákvæði hegningarlaga um hvort refsing þjónaði tilgangi ætti við um Kourani.

Kourani lýsi sig kerfisbundið saklausan af öllum sakargiftum, telji sig vera fórnarlamb í kerfinu og því sé honum allt leyfilegt. Hann geri sér fyllilega grein fyrir því sem hann gerir á hlut annarra, en sé gjörsamlega sama um allt og alla og teljist því fremur hættulegur einstaklingur. Hann hafi upplifað alls kyns hrylling og djöfulskap í sínu heimalandi, sem trufli hann eflaust í dag, en réttlæti með engu móti framferði hans hér á landi. 

Geðlæknirinn hafi kveðið erfitt að átta sig á hvað stýri hugsunum Kouranis og hvort hann geri sér upp suma hluti, svo sem áhyggjur af mafíunjósnum, en óháð því greinist engar ranghugmyndir hjá honum. 

Velti fyrir sér hvað ætti að gera við Kourani

Hann hafi kveðist hafa skoðað ítrekað og mjög vandlega við vinnslu matsgerðar hvort áðurnefnd grein hegningarlaganna geti átt við um ástand Kouranis og komist að þeirri niðurstöðu að svo sé ekki. Kourani  þurfi engu að síður mikla hjálp, komi til fangelsisrefsingar, en erfitt sé að vita hvernig höndla eigi einstakling eins og hann og hvernig unnt sé að hjálpa honum. Hann búi við alvarlegar persónutruflanir, en teljist ekki bráðveikur andlega, svo sem einnig megi ráða af því mati lækna á geðdeild Landspítala að útskrifa hann þaðan í júní á þessu ári eftir aðeins þriggja til fjögurra sólarhringa nauðungarvistun. 

Geðlæknirinn hafi verið spurður hvort og þá hvernig skýra mætti meinta og endurtekna hráka Kouranis, sem og það að hann virðist gera sér far um að skvetta þvagi á fangaverði. Í framhaldi hafi geðlæknirinn áréttað að Kourani væri sama um allt og alla, telji sig ekki skulda öðru fólki neitt og geri það sem hann vilji hverju sinni.