Snorri um upp­haf sitt og Söru: „Væflaðist inn á skrif­stofu hjá mér“

Snorri Barón var gestur þeirra Vilhjálms Hallssonar og Andra Geirs Gunnarssonar í hlaðvarpinu Steve dagskrá. Venjulega snýr sá hlaðvarpsþáttur að knattsyrnu og öllu því sem við kemur íslenska sem og enska boltanum. Að þessu sinni snerist umræðan þó upp í hvernig það Snorri Barón endaði í þeirri starfsgrein sem er hans lífsviðurværi í dag.

„Þetta er mitt aðal og eina starf í dag. Ég starfræki stofu sem heitir því fallega íslenska nafni Bakland. Þetta er hugarfóstur mitt, þessi hugmynd kviknaði í kringum 2015 en þá var ég í öðrum bransa, rak auglýsingastofu og var á bólakafi í því,“ sagði Snorri Baron aðspurður hvort það væri ekki við hæfi að kalla hann umboðsmann. 

Hann hélt svo áfram: „Langaði alltaf að vinna aðeins meira með einstaklingum, þetta var orðið helvítis Groundhog day að hitta einhverja markaðsdeild sem hafði engan áhuga né skilning á því sem ég hafði fram að færa og enda á einhverri málamiðlun sem skilaði sér í „lala“ herferð og allt eftir því.“

„Mér var farið að hungra í eitthvað annað, hafði alltaf einhverja hugsjón um sjálfan mig að ég ætti eftir að fara lengra þannig ég fór að leggja vinnu í það og núna 2024 þá starfræki ég umboðsskrifstofu sem er með yfir 40 íþróttafólk út um allan heim á skrá. Erum með fólk alls staðar að nema úr Afríku, ég þarf að fara breyta því þar sem við erum með allar aðrar heimsálfur.“

Snorri Baron fer svo aðeins yfir það hvernig dyrnar hans inn í heim umboðsmanna og CrossFit opnuðust.

„Sara er sú sem opnar hurðina fyrir mig inn í þennan bransa allan, Sara Sigmunds fyrir þau sem ekki kveikja. Hún væflaðist inn á skrifstofu hjá mér í gegnum sameiginlegan vin árið 2016. Þá var hún orðin ofurstjarna í sinni íþrótt, búin að fara í tvígang á heimsleikana og í bæði skiptin búin að enda í 3. sæti.“

„Hún hafði allan þennan sjarma og allt þetta fram að færa. Hún var komin með fullt af auglýsingastyrkjum en í smá basli með hvernig ætti að vinna úr þessu. Henni vantaði einhvern til að aðstoða sig við að láta dæmið ganga upp. Við vorum tengd saman, það þurfti bara þennan eina fund fyrir okkur til að finna að það var mjög sterk tenging okkar á milli,“ sagði Snorri um sín fyrstu kynni af Söru en hún er líkt og Snorri sjálfur mikill rokkari.

Í kjölfarið snerist umræða þáttarins upp í uppáhalds hljómsveit Söru, Led Zeppelin, áður en rætt var örstutt um stöðu hennar í dag innan krossfitheimsins.

„Þetta eru búin að vera erfið þrjú ár hjá henni; meiðsli, sjálfsofnæmi og helvítis hark. Andinn er sterkur og hún mun snúa aftur betri en nokkru sinni fyrr.“

Þáttinn í heild sinni má hlusta á í spilaranum ofar í fréttinni en umræðan um Söru Sigmundsdóttur má heyra á fyrstu tíu mínútum þáttarins.