Vé­steinn reiður vegna Signufarsans á ÓL: „Aldrei upp­lifað neitt verra á ferlinum“

Guðlaug Edda Hannesdóttir keppti í þríþraut í dag og endaði í 51. sæti eftir að hafa dottið af hjóli sínu. Hún er fyrsti Íslendingurinn sem keppir í þríþraut á Ólympíuleikum.

Lengi vel ríkti mikil óvissa hvort hægt yrði að keppa í sundi í þríþrautinni vegna mengunar í Signu þar sem skipuleggjendur Ólympíuleikanna voru búnir að ákveða að sundhluti keppninnar færi fram. Vésteinn er ómyrkur í máli um farsann í kringum sundið í þríþrautinni en hann var til viðtals í Reykjavík síðdegis í dag.

„Ég hef verið gagnrýninn á þetta og er enn harðorðari í dag vegna þess ef ég tek Ólympíuleikana og París og síðan Alþjóða ólympíunefndina og Alþjóða þríþrautarsambandið skil ég hreinlega ekki, og ég er talsverður reynslubolti í þessu, á mínum elleftu Ólympíuleikum, hvernig er hægt að koma fram við íþróttafólkið eins og búið er að gera hérna,“ sagði Vésteinn og benti á að keppendur hefðu fengið að vita með afar skömmum fyrirvara hvort keppt yrði.

„Fólk er að fara að keppa klukkan átta um morgun og þjálfararnir og flokksstjórarnir fá að vita klukkan fjögur fimmtán hvort verður keppt eða ekki. Og ef það yrði ekki keppt yrði ekki keppt í sundi. Ég næ ekki upp í nefið á mér yfir þessu. Á mínum ferli hef ég aldrei upplifað neitt verra ef ég á að segja eins og það eru allir sammála um það.“

Allt brjálað hérna

Vésteinn á von því að einhverjir eftirmálar verði af öllu havaríinu í kringum sundið í Signu.

„Það er allt brjálað hérna. Keppnin fór fram á endanum en ég er alltaf að vinna með þjálfurum og íþróttafólki og mér finnst þetta móðgun við íþróttafólkið, hvernig er komið fram við það. Halda þessu fram á síðustu stundu og vera ekki með neitt plan B,“ sagði Vésteinn.

Meðal annars var rætt um að sleppa sundinu ef mengun í Signu yrði yfir leyfilegum mörkum. Það fannst Vésteini fráleitt. 

„Það finnst mér eiginlega það versta, að alltaf einu yrði sundið tekið út. Hvað erum við að fara keppa í tugþraut en bara í 8-9 greinum,“ sagði Vésteinn forviða.

Á ekki að geta gerst

Hann var svo spurður hvaða áhrif hringavitleysa síðustu daga hefði haft á Guðlaugu Eddu.

„Ég held að þetta hafi alveg haft sömu áhrif á hana og alla aðra. Við erum með öllum Norðurlöndunum hérna í þessum blokkum inni þorpinu og það eru allir vitlausir yfir þessu sem eðlilegt er. Það er eitthvað að hér. Svona lagað á ekkert að gerast. Svo hef ég komist að því frá Alþjóða þríþrautarsambandinu að þetta getur gerst út af veðri, að þeir sleppi einhverju en ég er að tala hér um Ólympíuleika. Fólk undirbýr sig í mörg ár fyrir þá og getur svo hugsanlega ekki keppt í greininni sinni,“ sagði Vésteinn.

„Ég verð bara að segja að ég hef sjaldan eða aldrei verið jafn hissa á ævinni þegar ég heyrði þessa umræðu. Hvernig getur maður komið fram við íþróttafólk, sem er að æfa í mörg ár til að komast á Ólympíuleika, að láta þau vita klukkan fjögur um nótt hvort það eigi að keppa klukkan átta um morgun?“

Hlusta má á viðtalið við Véstein í spilaranum hér fyrir ofan.