Bónus og Jysk ríða á vaðið í Korputúni

Í fréttatilkynningu segir að Reitir fasteignafélag sé eigandi þróunarsvæðisins og fari fyrir uppbyggingunni. Jysk hafi undirritað viljayfirlýsingu við Reiti um kaup á lóðum á svæðinu og Bónus hafi undirritað viljayfirlýsingu varðandi nýtt verslunarhúsnæði í hverfinu undir rekstur matvöruverslunar.

Korputún sé skipulagt út frá þörfum fólks og náttúrunnar en ekki síður út frá hefðbundnum þáttum, svo sem aðgengi, vöruflutningum og sýnileika. Samgönguás Borgarlínu muni liggja í gegnum skipulagssvæðið með Borgarlínustöð við verslunarkjarna svæðisins.

Höfuðstöðvar og verslun

Forsvarsmenn Bónuss hafi lýst yfir vilja til þess að verslun félagsins verði þar kjölfesta til framtíðar. Í verslunarkjarnanum verði jafnframt til leigu veitingarými og húsnæði fyrir aðra hverfisverslun og þjónustu.

Þá hafi Lagerinn Iceland, sem er móðurfélag Jysk á Íslandi, undirritað viljayfirlýsing við Reiti um kaup á lóðum þar sem gert sé ráð fyrir ríflega sautján þúsund fermetra byggingarmagni. Á lóðunum hyggist félagið byggja nýjar höfuðstöðvar ásamt vöruhúsi og verslun fyrir Jysk. Jafnframt sé gert ráð fyrir plássi fyrir aðrar verslanir á lóðinni auk skrifstofu- og þjónusturýmis.

Reiknað sé með að í hverfinu verði bæði tilbúið og klæðskerasniðið leiguhúsnæði í boði ásamt möguleika á að kaupa lóðir til uppbyggingar.

Mikilvægt að vernda dýralífið

„Höfuðborgarsvæðið er í mikilli þróun, ekki síst í norður- og austurhluta þar sem m.a. mun rísa byggð í Blikastaðalandinu og svo Keldnaholti þegar fram líða stundir. Þetta mun auka enn frekar þörf fyrir verslun og þjónustu á svæðinu. Korputún leikur mikilvægt hlutverk í þessari uppbyggingu með blómlegu atvinnulífi í nýju og vönduðu hverfi enda verður nýja atvinnuhverfið gífurlega vel staðsett og býður mikil tækifæri fyrir ólíka aðila,“ er haft eftir Guðna Aðalsteinssyni, forstjóra Reita.

Á sama tíma sé starfsfólk Reita mjög stolt af því að Korputún verði fyrsta atvinnuhverfið á landsvísu sem er skipulagt samkvæmt kröfum BREEAM Communities vistvottunarstaðalsins. Við skipulag hverfisins hafi verið lögð mikil áhersla á að lágmarka rask á vatnsmagni sem rennur í Korpu og unnin hafi verið vönduð viststefna fyrir hverfið. 

„Neðst í landinu, nálægt Korpu, er fallegt svæði með miklu dýralífi sem mikilvægt er að vernda.“

Korputún verði frábært verslunarsvæði

Haft er eftir Birni Inga Vilhjálmssyni, framkvæmdastjóra Jysk, að fyrirtækið leiti stöðugt tækifæra til að auka þjónustu við viðskiptavini þess,

„Að vera nær viðskiptavinum er hluti af okkar stefnu og uppbygging Jysk í Korputúni gerir okkur kleift að þjóna íbúum Mosfellsbæjar, Norðlingaholts og Grafarholts mun betur en áður. Íbúafjöldi á þessum svæðum hefur vaxið mikið á síðustu árum og með tilkomu uppbyggingar á Blikastaðalandi er fyrirséð frekari fjölgun íbúa. Korputún hefur allt til að bera til að verða frábært verslana- og þjónustusvæði og mun styðja við áframhaldandi vöxt JYSK.“

Þá er haft eftir Björgvini Víkingssyni, framkvæmdastjóra Bónuss, að Blikastaðaland sé eitt af framtíðarbyggingarsvæðum höfuðborgarsvæðisins og fyrirtækið sjái áhugaverð tækifæri í opnun verslunar þar undir nafni Bónuss. 

„Þannig hyggjumst við þjóna íbúum með góðu úrvali matvöru á lægsta mögulega vöruverði, hér eftir sem hingað til.“