Lofar að svara á­rásum Húta af hörku

 Á vef AP segir að ísraelsk yfirvöld hafi gefið í skyn að þau muni svara árásinni. Enginn lést í loftárásinni og engar stórar skemmdir urðu á byggingum en í ísraelskum fjölmiðlum má sjá fólk leita skjóls á flugvellinum. Í frétt AP segir að samkvæmt upplýsingum frá flugvellinum hafi verið hægt að hefja hefðbundna starfsemi stuttu eftir árásina.

Þar kemur einnig fram að ísraelski herinn hafi gert nokkrar tilraunir til að stöðva flugskeytið en að það virtist hafa brotnað upp í loftinu. Atvikið sé enn til skoðunar hjá hernum.

Hútar hafa ítrekað skotið drónum og loftskeytum í átt að Ísrael frá því að átök stigmögnuðust á Gasa í október í fyrra. Ísraelska hernum hefur tekist að stöðva þau nærri öll yfir Rauðahafinu. Einn lést í árás Húta á Tel Avív í júli og tíu særðust. Ísraelar svöruðu þeirri árás með loftárás á svæði Húta í Jemen, þar á meðal á hafnarborgina Hodeidah.

Svarar eins og í júlí

Í frétt AP segir að Benjamín Netanyahyu hafi í viðtali eftir ríkisstjórnarfund í dag gefið í skyn að viðbrögð Ísraela nú yrðu með svipuðu móti og í júlí.

„Hútarnir eiga að vita núna að við krefjumst hárrar greiðslu fyrir allar tilraunir til að meiða okkur,“ sagði hann eftir fundinn og að allir sem þyrftu á áminningu um það að halda gætu heimsótt höfnina við Hodeidah.

Haft er eftir talsmanni uppreisnarsinnanna, Yahya Saree, að flugskeytinu hafi verið beint að hernaðarlegu skotmarki í Jaffa í Tel Avív. Auk þess að skjóta að Ísrael hafa Hútar ítrekað síðastliðið ár ráðist að flutningaskipum á Rauðahafinu sem þeir segja tengjast stuðningi við Ísrael. Í frétt AP segir að raunin hafi þó verið sú að flest skipin tengjast Ísrael ekki með neinum hætti.

Stríðið á Gasa, sem hófst 7. Október í fyrra, hefur haft gríðarleg áhrif á löndin í kring og er töluverð spenna talin ríkja þar. Yfirvöld í Íran hafa opinberlega stutt við ýmis herskáa uppreisnarhópa á svæðinu eins og Húta, Hamas og Hezbollah en uppreisnarmenn Hezbollah hafa nánast daglega átt í bardaga við ísraelska herinn frá því að stríðið hófst. Íran og bandamenn þeirra segja að það sé gert af stuðningi við palestínsku þjóðina.

Hezbollah hefur lýst því yfir að þau muni láta af árásum sínum verði tryggt vopnahlé á Gasa. Sáttamiðlarar frá Egyptalandi, Bandaríkjunum og Katar hafa í marga mánuði reynt að leita leiða til að tryggja vopnahlé án árangurs. Í viðræðunum er einnig leitað leiða til að tryggja frelsun gísla sem Hamas tóku í október í fyrra.

Undirgöngin lokuð

Forsætisráðherra Ísrael hefur ítrekað sagt að ekkert verði af vopnahléi nema Ísrael taki stjórn á Gasasvæðinu við landamæri Egyptalands, til frambúðar. Hann segir Hamas-liða nota landamærin til að smygla vopnum og búnaði inn á Gasa-svæðið og hafi notað til þess undirgöng. Greint var frá því fyrr í vikunni, samkvæmt frétt AP, að af þeim tugum undirganga sem hafi fundist undir landamærunum hafi níu þeirra náð til Egyptalands og að þeim hafi öllum verið lokað.

Frá því að stríðið hófst í október hafa um 40 þúsund Palestínumenn, aðallega konur og börn, látið lífið í árásum Ísraela. Milljónir hafa þurft að flýja heimili sín og eru enn á vergangi um Gasa-svæðið.