Óttast að her­menn Kim öðlist reynslu af hernaði

Í frétt Reuters er vísað í yfirlýsingu frá embætti forseta Suður-Kóreu um að slíkar vendingar gætu ógnað öryggi ríkisins verulega. Ráðamenn í Suður-Kóreu hafa gefið í skyn að til greina komi að senda Úkraínumönnum hergögn og vopn en það hefur ekki verið gert hingað til. Suður-Kórea er einn stærsti vopnaframleiðandi heims.

Yonhap fréttaveitan hefur eftir embættismönnum í Suður-Kóreu að þar sé talið að búið sé að senda að minnsta kosti ellefu þúsund hermenn frá Norður-Kóreu til Rússlands. Einhverjir þeirra hafi þegar verið sendir að víglínunum.

Talið er að um unga menn sé að ræða og þykir líklegt að tiltölulega stutt sé síðan þeir hófu herkvaðningu.

Sjá einnig: „Ein­stak­lega blóðugur“ septem­ber

Ráðamenn í Bandaríkjunum segja líklegt að norðurkóresku hermennirnir verði notaðir sem fótgöngulið og að þeir muni að öllum líkindum byrja að berjast við Úkraínumenn í Kúrsk á næstu vikum. Þeir eru sagðir klæðast rússneskum herbúningum og búnir rússneskum vopnum.

Sjaldgæft tækifæri til að öðlast peninga

Fyrrverandi hermenn frá Norður-Kóreu segja líklegt að hermennirnir séu stoltir yfir því að hafa verið sendir til Rússlands og líti á þetta sem sjaldgæft tækifæri til að öðlast peninga. Samkvæmt AP fréttaveitunni gætu fjölskyldur mannanna í Norður-Kóreu hagnast á þjónustu þeirra.

„Þeir eru of ungir og munu ekki skilja nákvæmlega hvað þetta þýðir. Þeir líta bara á það sem heiður að vera valdir úr hópi fjölda hermanna og sendir til Rússlands,“ sagði Lee Woong Gil, sem flúði frá Norður-Kóreu árið 2007 en þar áður var hann í sömu sérsveit og hermennirnir sem nú eru í Rússlandi.

Hann sagðist þar að auki nokkuð viss um að margir hermannanna muni ekki snúa aftur til Norður-Kóreu.

Lee þjónaði í sérsveitinni frá 1998 til 2003. Hann segir sveitina hafa fengið betri mat og frekari byrgðir en aðrar sveitir en þrátt fyrir það hafi margir meðlimir hennar þjáðst af vannæringu og berklum.

Kim Yong Hyun, varnarmálaráðherra Suður-Kóreu, lýsti hermönnunum norðurkóresku í samtali við þingmenn í síðustu viku sem „fallbyssufóðri“. Sakaði hann Kim Jong Un, einræðisherra Norður-Kóreu, um að selja her sinn sem málaliða til notkunar í ólöglegu innrásarstríði.

Annar fyrrverandi hermaður frá Norður-Kóreu sagði í samtali við AP að margir ungir menn myndu stökkva á tækifærið til að ferðast til annars lands og mögulega eignast meiri peninga en í boði væri fyrir þá heima.

Þeir myndu líta á þetta sem einstakt tækifæri.

Þar að auki séu margir sem gætu litið á þetta sem tækifæri til að gefast upp og biðja um að verða sendir til Suður-Kóreu.

Yfirvöld í Suður-Kóreu hafa ákveðið að senda hóp manna til Úkraínu sem ætlað er að yfirheyra norðurkóreska hermenn sem enda í höndum Úkraínumanna.

Utanríkisráðherra í Rússlandi

Utanríkisráðherra Norður-Kóreu ferðaðist í gær til Rússlands.

Samkvæmt frétt Tass fréttaveitunnar, sem er í eigu rússneska ríkisins, mun Choe Son Hui, utanríkisráðherra Norður-Kóreu, funda með Sergei Lavrov, kollega sínum. Er það sagt í samræmi við varnarsamkomulag sem Vladimír Pútín og Kim Jong Un, einræðisherrar Rússlands og Norður-Kóreu, skrifuðu undir í sumar.

Ráðamenn í Rússlandi sögðu í fyrstu að fregnir af norðurkóreskum hermönnum í Rússlandi væru rangar. Seinna meir hættu þeir að þræta fyrir þá en staðfestu flutningana ekki. Á föstudaginn sagði Vladimír Pútín, forseti Rússlands, svo að það kæmi engum öðrum við hvort Rússar notuðu hermenn frá Norður-Kóreu eða ekki.