Gengið frá kaupum Haga á fær­eyska verslana­risanum

Í tilkynningu Haga til Kauphallar segir að öll skilyrði kaupanna, sem tilkynnt var um þann 22. október, hafi verið uppfyllt, þar með talið áreiðanleikakönnun og samþykki eftirlitsaðila í Færeyjum. Markmið kaupanna sé að renna frekari stoðum undir og styrkja rekstur Haga á sviði dagvöruverslunar og auka skilvirkni rekstrar og vöruúrval SMS í Færeyjum.

Ríflega sex milljarðar auk skuldayfirtöku

Hagar greiði kaupverð með reiðufé að upphæð um 267 milljóna danskra króna og afhendingu 13.867.495 hluta í Högum að virði 60 milljóna króna. Það gerir heildarvirði SMS í viðskiptunum um 6,4 milljarða króna.

Meðalgengi á hlutum Haga í viðskiptunum hafi verið 85,23 krónur, sem byggi að stærstu leyti á dagslokagengi Haga þann 18. október. Endanlegt uppgjör vegna kaupanna gæti breyst lítillega tengt rekstrarafkomu SMS á næstu tveimur til þremur árum. Hagar hafi fjármagnað hluta kaupverðs með nýju 200 milljóna danskra króna láni en til viðbótar yfirtaki Hagar nettó skuldir SMS upp á um það bil 140 milljónir danskra króna. Skuldsetning Haga aukist sem því nemur. 

Þannig er kaupverðið (e. enterprise value) 467 milljónir danskra króna, um 9,4 milljarðar íslenskra króna.

Umfangsmikil starfsemi

SMS sé leiðandi verslunarfélag í Færeyjum og reki meðal annars átta Bónus lágvöruverðsverslanir víða í Færeyjum, fjórar smærri verslanir í Þórshöfn undir nafninu Mylnan og stórverslunina Miklagarður í Þórshöfn. SMS sé einnig umsvifamikið í annarri starfsemi, meðal annars rekstri stærstu verslunarmiðstöðvar Færeyja, fjölda veitingastaða, smávöruverslana, brauð- og kökugerðar, kjötvinnslu og líkamsræktarstöðva. 

Að auki eigi félagið fjölbreytt fasteignasafn sem telji um ellefu þúsund fermetra, sem sé að mestu nýtt undir eigin starfsemi en að hluta leigt til þriðja aðila. Ríflega 700 manns starfi hjá SMS og dótturfélögum, en forstjóri félagsins sé Niels Mortensen. Niels sé jafnframt eigandi NM Holding sem hafi átt helmingshlut í SMS fyrir kaup Haga, en hinn helmingurinn hafi verið í eigu félagsins P/F Farcod. 

Heildartekjur SMS á rekstrarárinu 2023 hafi numið tæplega 700 milljónum danskra króna og hagnaður fyrir fjármagnsliði og afskriftir, EBITDA, hafi numið um 56 milljónum danskra króna.

Bjóða SMS velkomin í fjölskylduna

„Það er mér mikil ánægja að bjóða SMS í Færeyjum velkomin í Haga fjölskylduna. Við höfum á síðustu mánuðum kynnst starfsemi SMS vel, en fyrirtækið er bæði vel rekið og þjónar mikilvægu hlutverki í færeysku samfélagi. Áherslur í starfsemi SMS, m.a. á hagkvæmustu matarkörfuna og góða upplifun í verslunum, ríma vel við leiðarljós okkar hjá Högum. Við erum stolt af því að vera treyst fyrir eignarhaldi á SMS til framtíðar og munum styðja við áframhaldandi þróun og vöxt félagsins, Færeyingum til hagsbóta. SMS mun áfram njóta forystu Niels Mortensen, forstjóra, sem hefur leitt kröftuga uppbyggingu félagsins undanfarna tvo áratugi. Við hlökkum til samstarfs við Niels og framúrskarandi hóp starfsfólks í Færeyjum um að efla góðan rekstur enn frekar, m.a. með því að nýta tækifæri til að auka hagkvæmni, efla vöruval og þjónustu við landsmenn,“ er haft eftir Finni Oddssyni, forstjóra Haga.

Þá er haft eftir Niels Mortensen, sem verður áfram forstjóri SMS, að með undirritun kaupsamnings við Haga sé mikilvægur og ánægjulegur áfangi í höfn fyrir SMS og fyrir verslun í Færeyjum.

„Framúrskarandi starfsfólk SMS hefur á undanförnum áratugum byggt upp leiðandi verslunarfyrirtæki sem hefur ávallt haft það að forgrunni að stuðla að bættum lífskjörum Færeyinga með aðgengi að hagkvæmri matvörukörfu, áhugaverðum verslunum og í seinni tíð veitingastöðum. Með aðkomu Haga höfum við ekki aðeins fengið nýjan og traustan eiganda heldur einnig samstarfsaðila sem mun gera okkur kleift að gera jafnvel enn betur en áður. Það er okkur fyrrum eigendum hjartans mál að við tökum áfram þátt í rekstri og eignarhaldi SMS, nú í gegnum hlutafjáreign í Högum. Við hlökkum til að vinna með Högum að vexti og velgengni SMS og treysta um leið viðskipta- og vinasamband á milli Færeyja og Íslands.“