Freyju og Góu blöskrar um­mæli frá Nóa Siríus

Verðlagseftirlit ASÍ vakti athygli á því í vikunni að verð á súkkulaði hjá Nóa Siríus hefði hækkað langmest af öllum vörum í nýrri samantekt eftirlitsins. Verðhækkun Nóa Siríus nam tæpum 23 prósentum en verðið hjá Freyju fór upp um rúm tíu prósent og sjö prósent hjá Góa Lindu.

Hinrik Hinriksson, framkvæmdastjóri sölusviðs hjá Nóa Siríus, sagði í viðtali við fréttastofu að gríðarlegri verðhækkun á kakói, sem súkkulaði er unnið úr, væri um að kenna.

„Þetta eru fordæmalausir tímar sem við erum að upplifa, og við þurfum að bregðast við með einhverjum hætti,“ sagði Hinrik. Hann áætlar að hækkun á vörum Nóa Síríus nemi einum fimmta eða einum fjórða af þeirri verðhækkun sem lendi á fyrirtækinu.

„Eftir því sem ég best veit erum við eina fyrirtækið sem er að framleiða íslenskt konfekt sem er ekki flutt inn. Það er til dæmis lykilatriði myndi ég segja,“ sagði Hinrik.

Pétur Thor Gunnarsson, framkvæmdastjóri Freyju, segist knúinn til að tjá sig vegna þessara ummæla samkeppnisaðila.

„Upp hefur sprottið umræða vegna athugasemda frá íslenskum sælgætisframleiðanda þess efnis að hann sé sá eini sem framleiði íslenskt konfekt sem er rangt. Sama fyrirtæki hefur einnig ýjað að því að notkun á súkkulaðilíki í súkkulaðiframleiðslu sé orðið mjög algengt,“ segir Pétur.

„Eftir minni bestu vitneskju, er allt konfekt frá íslenskum framleiðendum framleitt á Íslandi. Súkkulaði frá Freyju er hágæða íslensk framleiðsla. Allt konfekt og allt súkkulaði sem Freyja selur yfirhöfuð er framleitt í verksmiðju fyrirtækisins á Kársnesbraut í Kópavogi. Frá stofnun fyrirtækisins, árið 1918, höfum við notast við sömu uppskrift og einvörðungu notað bestu fáanlegu hráefni, þ.m.t. kakómassa.“

Freyja hafi í fyrra endurvakið aldagamla arfleifð og hafið á ný framleiðslu á konfekti.

„Við byggjum konfektgerðina okkar á gömlum uppskriftum og framleiðslu aðferðum. Undanfarið höfum við þróað skemmtilegar nýjungar á borð við piparkökumola og Yuzu-chilli-lime mola sem hafa fengið fráfærar viðtökur og Íslendingum finnst þetta skemmtileg nýjung í konfekt flóruna.“

Góa-Linda tekur undir með Freyju

Góa-Linda segir sömuleiðis í tilkynningu að fullyrðing Nóa Siríus sé kolröng. Góa-Linda framleiði allt súkkulaði, lakkrís og kex í verksmiðju sinni í Garðahrauni og hafi gert í áratugi.

„Við erum afar stolt af okkar íslensku framleiðsluhefð sem nær allt aftur til ársins 1968, þegar Góa hóf starfsemi sína með einni karamelluvél. Hraun, sem allir Íslendingar þekkja, hefur verið flaggskip okkar allar götur síðan. Vegna rangra staðhæfinga keppinauta á markaði höfum við fengið símtöl frá tryggum viðskiptavinum sem vilja fullvissa sig um þetta. Við erum með íslenskt sælgæti út í gegn,“ segir Atli Einarsson, viðskiptastjóri Góu-Lindu.

Árið 1993 sameinuðust Góa í Hafnarfirði og Linda á Akureyri, „tvær ástsælar sælgætisgerðir“ sem hafi djúpar rætur í íslenskri menningu. Árið 2002 var rekstur lakkrísgerðarinnar Drift sf. einnig keyptur inn í Góu-Lindu, sem markaði nýjan kafla í sögu fyrirtækisins.

„Það er mikilvægt að halda réttum staðreyndum á lofti. Við hjá Góu-Lindu leggjum mikla áherslu á að halda framleiðslunni íslenskri og styðja við íslenskan vinnumarkað og samfélag. Við munum áfram leggja áherslu á gæði og sanngjarnt verð fyrir viðskiptavini okkar sem gera sér glaðan dag með uppháhaldsnamminu sínu.“

Fréttin var uppfærð með viðbrögðum Góu-Lindu.